To elitekampar til Husnes: – Vi har gjort eit skup

– Volleyballgruppa i IL Trio har gjort eit skup og forhandla til seg to eliteseriekampar på Husnes. Mizunoligaen, som eliteserien heiter, flyttar med det inn i Kvinnherad Arena denne helga. Éin herrekamp og éin damekamp - begge kampane går av stabelen 9. februar. Og ikkje berre det, i damekampen skal nokre av Kvinnherad sine dyktigaste spelarar måla krefter, nærast jublar Øystein Lie Sundal i Volleyballgruppa i ei pressemelding.

Han ramsar opp at Christine Skogseth Bjørsvik skal opp mot Siri Aasgaard og Lilli Tuften Aksnes-Øystese. Christine sitt Koll, som vart NM-meister i fjor, skal bryna seg på Siri og Lilli sitt TVN (Toppvolley Norge).

Men fyrst skal NM-finalist på herresida, BK Tromsø, møta TVN (Toppvolley Norge).

Ikkje småtassar

– Det er ikkje nett nokre småtassar som tek turen. På damesida har Koll vunne NM-tittelen tre år på rad no, og har 17 i skapet. På herresida kan Tromsø skilta med 10 NM-titlar. Det er kjekt at Kvinnherad og Trio får vera vertskap for ypparste nivå av ei idrettsgrein med lang historikk i kommunen. Bli med, så lagar vi eit herleg kok i arenaen denne søndagen, oppmodar Øystein Lie Sundal.

Også dei lokale spelarane gler seg til kampen.

– Det blir skikkeleg kjekt å spela bortekamp på «heimebane»; det byrjar å bli nokre år sidan sist. Det er stas å få visa fram heimbygda mi til laget, og ikkje minst den flotte, nye arenaen. Eg håpar også at både Trio og lokalmiljøet synest det er gøy og motiverande å få sjå volleyballkamp på elitenivå på dame- og herresida. Eg gler meg verkeleg, seier Christine Skogseth Bjørsvik i pressemeldinga.

Kjende på tribuna

– Eg synest det er veldig gøy at Trio skal arrangera dette. Og gler meg til å spela på det høgaste nivået i Noreg så lokalt, og forhåpentlegvis ha mange kjende på tribuna. Eg gler meg mykje til å få spela på «heimebane» og å visa lagkameratane mine heimplassen min og å kjenne på stemninga i arenaen på Husnes, supplerer Lilli Tuften Aksnes-Øystese.

Det kan leggjast til at under opphaldet på Husnes skal TVN ha trening med ungdomslaga til Trio volleyball.