Tina & co klare for Champions League

Sesongen 2023/24 vart tidenes beste for Storhamar sitt handballag for damer, som har husnesingen Tina Abdulla som ein av dei mest profilerte spelarar. Klubben frå Hamar vann European League, og tok sølv i serie, NM og sluttspel.

Men å koma inn i den aller gjævaste turneringa, Champions League, er ikkje enkelt. Ni europeiske lag var sikra plass, men ikkje Storhamar. Dermed måtte klubben søkja om å få vera med. Fredag vart det bestemt at ynsket vert oppfylt.

– Vi har jobba hardt for å få den billetten! Det å få det stadfesta i dag gjer nok mykje med gruppa. Eg er så glad for at vi får delta i det største selskapet. Vi gler oss, seier Storhamar-spelar Mia Solberg Svele til klubben si heimeside.

Dette er garantert godt nytt for Tina Abdulla også. I vinter forlenga 26-åringen kontrakten med Storhamar ut neste sesong.

Tina tatt ut på rekruttlandslaget

Rå sesong

– I utgangspunktet var eg ikkje så spent, for vi var klar over at vi har innfridd på alle kriteria på sport og ting vi får gjort noko med. Men så gjekk det rykte i kulissane om at ein tv-avtale ikkje var på plass, og at det kunne fella oss. Uavhengig av ein tv-avtale, er det sjølvsagt at vi skulle vera med, kommenterer Storhamar-trenar Kenneth Gabrielsen.

Han gler seg til ein «rå sesong». Champions League startar med to grupper med åtte lag kvar. Det betyr 14 innleiande kampar for Storhamar.

– Vi er betre rusta til Champions League enn førre gong vi var med. Vi har meir rutine og er sterkare no, meiner Gabrielsen.

Trekkinga av gruppene skjer i Wien 27. juni. Kampane startar fyrste helga i september.

I det norske seriespelet opnar Storhamar sesongen 31. august. Klubben startar likegodt heime mot suverene Vipers frå Kristiansand, som har vunne ligaen sju år på rad.

– Det er det sjukaste eg har vore med på