Tina Abdulla tatt ut på A-landslaget
Sjølv om det er ein lang veg frå Husneshallen til A-landslaget, har Tina Abdulla klart å gå han.
Publisert
Sist oppdatert
Med ein sterk sesong for Storhamar har Tina Abdulla spelt seg inn på A-landslaget. Abdulla har nettopp gjort seg ferdig med samling med rekruttlandslaget (8.-12. juni), og er éi av åtte debutantar i troppen til landslagssjef Thorir Hergeirsson.
Samlinga går frå 17. til 23. juli, og inneheld blant anna kamp mot eit anna av verdas beste handballag, Frankrike. Kampen skal spelast i Bodø 22. juli.
Annonse
Då Tina i fjor sommar returnerte til den norske toppserien etter tre år i Borussia Dortmund, gav ho uttrykk for at ho trudde det ville gagna landslagssjansane:
– På dette tidspunktet i karrieren min, så trur eg det rette er å reisa til Storhamar. Eg har ambisjonar om landslaget, og ein blir tettar følgt når ein spelar i Norge. Det er ikkje berre for landslaget eg flyttar på meg, men eg føler det er det rette for mi utvikling. Eg hadde andre tilbod som også vart vurdert. Det var heile pakken på Hamar førte meg dit, sa Tina i juni i fjor.
Eitt år etterpå kan ein konstatera at ho trefte med den vurderinga.
