Tilbake på vinnarsporet
Etter fire sett, kom Strand-Ulv sigrane ut av volleyballkamp mot BTSI.
Etter tapet mot Rossvoll i førre kamp, var Strand-Ulv-spelarane fast bestemte på å vinne kampen mot BTSI tysdag kveld.
Første settet var veldig jamt, men det enda med at BTSI fekk inn det siste poenget i settet, og vann med 25-23. Det såg ut som at det første settet berre var ei oppvarming for dei unge heimejentene, for allereie i det andre settet slo Strand-Ulv tilbake med heile 25-16.
Annonse
I det tredje settet hadde heimelaget fått opp dampen, var gode og varme og vann 25-16 nok ein gong. I det fjerde settet såg det ut til at dei flinke spelarane i Strand-Ulv ville vinna 25-16 for tredje gong, men BTSI samla seg til ein sluttspurt og gjorde eit comeback med fleire poeng på rad, slik at vertane vart ståande på 24 poeng lenge.
Publikum reiste seg opp, spente på å sjå om jentene frå Strand-Ulv ville få inn den siste og avgjerande ballen. Silje Vik tok godt vare på eit fint legg frå Ronja Kirketeig og sytte for det matchvinnande poenget. Det gav 25-20, og Strand-Ulv-damene kunne ta i mot ståande applaus frå tribunen.
Denne helga skal Strand-Ulv spela ny heimekamp, mot BSI2, med gode sjansar til å forlengja sigersrekka.
