Testar ultraløp i romjula: - Ikkje berre for galningar
Rosendal Løpeklubb arrangerer eit såkalla Back Yard Ultraløp fjerde juledag. Då skal ein springa ei løype på 6,7 kilometer så mange gonger ein vil, over totalt 12 timar.
– Alle kan koma og prøva, og det er ikkje berre for dei som er galne i hovudet. Ein kan ta det roleg, og ein kan koma og starta seinare på dagen enn klokka 7 om ein vil, seier Stine Hatteberg i Rosendal Løpeklubb.
Klokka 7 om morgonen den 28. desember startar arrangementet på Rosendal Stadion. Løypa går opp Omshagen, gjennom Baronihagen og Steinparken, ned Målet, via Omshagen og tilbake på banen. Denne løypa kan deltakarane gjenta så mange gonger dei orkar, men dei må passa på å vera ved startpunktet på banen ved kvar heile time for ny runde.
Annonse
Vil samla erfaringar
– Dersom ein ikkje står på start kvar heile time, så er ein ute av løpet. Så ein må berekna kva ein rekk på éin time, og passa godt på tida. Det er lurt å ta det roleg, seier Hatteberg.
Arrangementet i romjula er eit testløp før eit endå større arrangement i mars som Hatteberg og løpeklubben har planar om.
– Den 15. mars har me lyst til å arrangera eit ultraløp til inntekt for eit godt formål, då for deltakarar både herifrå og utanfrå kommunen. No køyrer me eit testløp for å samla oss litt erfaringar.
Annonse
Arrangørane har bestilt gymsalen i samfunnshuset, og der kan løparane ha ein base for å byta klede og få seg litt næring mellom rundane.
Står klare med rullestol
– Me får koka suppe eller noko, så deltakarane får i seg noko varmt innimellom, seier Stine Hatteberg.
Ho fortel at ho veit om mange løparar som skal delta. Mellom anna har Trio meldt si interesse, og ryktet seier at Johannes Heien frå IL Ternen har eit mål om å springa 80 kilometer.
Ultraløpet skal vara i 12 timar, så klokka 19 er arrangementet overstått. Då har det blitt bestilt bord på Gjøa for deltakarane.
– Då må me ha mat! Det kan vel henda me må stå klare med nokon rullatorar eller rullestolar òg for stive og såre bein, ler Stine Hatteberg.
