Teken ut til neste IBU-cup

Norges Skiskytterforbund har teke ut troppane til neste runde både i verdscupen og IBU-cupen. Då skal utøvarane til Tyskland, til høvesvis Oberhof og Arber.

«Basert på resultata i Oberhof og Arber kan også enkelte herifrå vera aktuelle for Ruhpolding», skriv forbundet i ei pressemelding. VM-uttaket vert gjort i etterkant av verdscuprunden i Ruhpolding.

Førre IBU-renn gjekk av stabelen i Obertilliach. Der sytte Ragnhild Femsteinevik for norsk siger på mixstafetten.

– Herrane fortset den store dominansen med tredobbelt på begge konkurransane i Obertilliach. Kvinnene er litt bak på dei individuelle konkurransane, men stod fram fantastisk bra på stafettane, og var med og sikra sigeren på både mix- og single-mixstafetten, seier utviklingssjef Anders Brun Hennum i pressemeldinga.

Norge sender i alt 12 kvinner og menn for å gå renna i Arber frå 9. til 12. januar. Blant dei er Ragnhild Femsteinevik frå Hatlestrand. Ho representerer Hålandsdal IL.