Tapte i Tsjekkia
EM-kvalifiseringa starta så bra, men torsdag kom dei norske volleyballherrane ned på landjorda igjen.
Publisert
Lars Kristian Ekeland og resten av landslaget i volleyball drøymer om å bli historiske ved å kvalifisera Norge til EM for aller fyrste gong. Det starta strålande med 3-0 heime over Montenegro i midten av august. Torsdag var det klart for kamp nummer to, denne gong borte mot Tsjekkia i Praha.
«I ein liten, intim hall var det fullt fokus på heimelaget, og det verka som Norge aldri kom heilt i gang. Vi sleit lenge med angrepsrytmen i dei fyrste setta, og korkje Hettervik eller Olsen klarte heilt å finna angrepsspelarane sine før ut i tredje sett. Men der Norge sleit mest var nok frå baklinja, for vi klarte aldri å setja Tsjekkia under noko som helst press. Då vart det tøft mot eit svært solid heimelag», oppsummerer nettstaden Volleyball.no.
Annonse
Tsjekkia vann 3-0 etter settsifra 25-17, 25-14 og 25-20. Som i den fyrste kampen, vart det ikkje speletid på Lars Kristian Ekeland frå Hatlestrand.
Beste velgåande
Draumen om EM lever framleis i beste velgåande. Kvalifiseringa held fram fyrst i august neste år, og då vert det avgjort kven som får delta i EM i Italia og Tyrkia i 2026.
«I kvalifiseringa er det totalt sju puljar med tre lag i kvar pulje. Alle puljevinnarar samt dei fem beste toarane kvalifiserer seg til EM. Norge ligg no på en 2. plass i puljen med ein viktig 3-0-siger i lomma, så moglegheitene er framleis svært gode», vurderer Volleyball.no.
