Takknemlege for gåve til den nye kunstgrasbanen

Trio og Festidalen fekk kveldens største gåver, då kvar tok i mot 200.000 kroner. Fyrstnemnde skal no starta bygginga av ny kunstgrasbane, rettare sagt at den gamle grusbanen skal få nytt dekke. Pengane skal nyttast til mål, innbytarbenk og scoringstavle. I tillegg skal det installerast lydanlegg som vil omfatta begge kunstgrasbanane.

Klubben var under arrangementet representert ved leiar Eskil Moen og Lena Medhaug.

– Fyrst og fremst er vi utruleg takknemlege for at vi har aktørar i Kvinnherad som legg til rette for aktivitet som vil treffa mange i mange år framover. Dei støttar også tiltak som er smale og såleis umoglege å finansiera. Pengane skal gå til utstyr som 350-400 barn og unge vil ha glede av i tiår framover, sa Moen til Grenda.

– Det hadde blitt dyrt om vi skulle ha dekka desse pengane inn via treningsavgifta. Vi er opptekne av at vi ikkje skal ha dei same tilhøva her som hjå einskilde klubbar i Bergen, der foreldra må ut med mange tusen kroner i året for at ungane skal kunna vera med og trena, la han til.