Sykkelklubben stilte med åtte på Birkebeinerrittet 2022

Åtte ivrige ryttarar frå Kvinnherad Sykkelklubb deltok i helga på den 29.utgaven av Birkebeinerrittet.

Det velkjente sykkelrittet er Norges største sykkelarrangement, med om lag 3500 deltakarar på dei ulike arrangementa Ultrabirken, TurBirken, UngdomsBirken og Birkebeinerrittet. Birkebeinerrittet er 86 km langt, strekker seg frå Rena til Lillehammer og inneberer 1400 høgdemeter.

Sterk debut

Frå Kvinnherad Sykkelklubb deltok Frode Sønstabø, Reidar Pedersen, Vegard Saghaug, Rune Haugland, Oddvar Eikenes, Håvard Pedersen, Roger Nundal og Ingeborg Hestad i styrkeprøven.

– Turen over fjellet gjekk i strålande sommarvêr og fint føre. Dette gav seg utslag i rekordar i fleng blant KSK-gjengen. Fem av oss åtte sette ny bestetid, og sju klarte Merkekravet, fortel Roger Nundal i sykkelklubben.

Merkekravet blir berekna separat for kvar aldersklasse ved at ein legg til 25 prosent på gjennomsnittstida for dei fem beste som startar i den aktuelle aldersklassen.

– I åtte år har det så og seia vore ein fast gutegjeng frå klubben som har hatt Birken som årets høgdepunkt. Det var difor utruleg kjekt at Ingeborg Hestad i år meldte seg på, og ville vera med på dette eventyret, seier Nundal.

Den unge jenta klokka inn på tida 3.47.19, og vart 6.beste kvinne av 16 i sin klasse K20-24 og tok det prestisjefylte Birkenmerket på første forsøk. Det er ein debut det står det stor respekt av, blant anna fordi ho ikkje er kjent med løypa, som byr på svært lange, seige bakkar og kupert terreng, der det er ein stor fordel å kjenna til kor ein skal bruka kreftene.

12. merke

Rune Haugland var med for 15. gong, og klokka inn på tida 3.09.00, som er ny beste tid for han, og tok sitt 12. birkenmerke.

Håvard Pedersen viste styrke i sin 12 deltaking. Sandvollekspressen tilbakela strekninga på 3.05.36, og forbetra si beste tid med om lag 2 minutt, og fekk sitt 11. birkenmerke. Dette heldt til ein sterk 19. plass av 386 deltakarar i klasse M45-49.

Reidar Pedersen byrja å sykla i godt vaksen alder, og har sett ny bestetid i alle sine fem deltakingar. I år stoppa klokka på 3.07.36, ny pers med rundt 3,5 minutt, og sikra seg sitt fjerde birkenmerke.

I år klarte Vegard Saghaug birkenmerket for første gong. Målet var ei sluttid på 3.30. I mål viste klokka 3.35.23, som heldt til merke. Frode Sønstabø var i forkant av rittet litt skeptisk på formen grunna mykje pendlarjobbing, men hadde merkekravet som mål. Tida 3.29.32 var heile 13 minutt innanfor merkekravet.

Ikkje som planlagt

Oddvar Eikenes hadde klart å prikka inn ein bra form, og klokka inn på 3.28.06. Det resulterte i hans fjerde merke på åtte forsøk, og 111.plass av 386 i klassen M45-49.

Ikkje alle fekk det som dei hadde tenkt under Birkebeinerrittet. Roger Nundal deltok i sitt sjuande birkenritt, men hadde ikkje formen inne.

– Uvissa på kva som var gale, fortvilinga over å ha lagt ned masse tid og trening og ikkje få meir ut av det, og enda 15 minutt bak merkekravet i klasse M40-45, det tærer på eit idrettshovud, kommenterer Nundal.

– Det tek litt tid å svelga skuffelsen når ein har så stor skivebom på målet som dette, men slik er det berre, og ein får ikkje gjort så mykje med dette rittet anna enn å sjå framover og kanskje dra noko lærdom av dette også, legg han til.

Til neste år kjem ein ny sjanse!