Suveren start på sesongen

Etter ein imponerande andreplass i Nordsjørittet søndag, kan Vidar Mehl no skilta med pallplass i sju av åtte sykkelritt denne sesongen.

– Ja, det har gått valdsamt bra til no i sesongen. Og det er mange grunnar til det, eg var blant anna vore frisk i heile vinter og fekk lagt ned eit skikkeleg godt treningsgrunnlag. Det er tettare og meir langsiktig planlegging knytt til treningskvardagen, og så har vi gjort små justeringar som har vore med på å trygga styrkane mine som syklist, seier omvikdelingen.

 

Blitt tyngre

Blant anna har han og trenaren sett av meir tid i styrkerommet.

– Det er jo ikkje så kjekt for oss syklistar å bli tyngre, men det har eg faktisk blitt. Og det ser jo ut til å ha fungert veldig bra så langt, ler Mehl.

Ein annan faktor som har betydd mykje er overgangen til hardtsatsande Team Swix HardRocx.

– Det har vore veldig positivt for meg. Ikkje minst med tanke på motivasjonen som kjem når du går over til eit nytt lag. Eg har gått «all in» på alle treningsøktene, noko eg har igjen for no, seier han.

 

Travelt

Treningstimane i vinter betaler seg godt no i sommarmånadane. For med eit mål om å gå til topps på samanlagtlistene i norgescupen, samt kjempa om pallplass i NM, Grenserittet og i Cykelvasan, er det travle tider i vente. Men Mehl kjenner seg pigg, noko han igjen viste i helga som var.

– Det vart ein litt sur andreplass i Nordsjørittet. Og ein skal jo ikkje klaga over det. Men eg låg i tet heile vegen og alt såg veldig bra ut fram til eg punkterte. Så utan den er eg ganske sikker på at eg hadde teke min fyrste norgescupsiger på søndag. Men punkteringar er ein del av sporten, seier mannen som ligg som nummer to på samanlagtlistene i norgescupen.

Neste sjanse til å ta ein siger i norgescupen kjem i midten av juli. Før det skal han gjennom eit tredagarsritt på Tynset, og forhåpentlegvis kjempa i toppen når NM går av stabelen på Skeikampen om tre veker.

– Ein kan jo ikkje venta at ting skal gå så bra som det har gjort den siste tida, men eg har alltid ei målsetning om å vera med og kjempa om sigeren. Så blir det spanande å sjå korleis det går, sluttar Mehl.