Strand-Ulv vann finalen

Fyrste settet var svært jamt fram til stillinga stod 17-17. Då imponerte Maren Næss Våge og serva settet heim til 25-17. Andre settet gjekk på mykje det same viset fram til stillinga stod 18-18. Fyrst då byrjar dei å dra i frå og både sett- og kampsigeren var eit faktum.

«Underdog»-stempel

--Det var veldig jamt spelt og ein spanande kamp. I fyrste settet får me etter kvart ein god servar på serv, og då går me litt i frå og får det litt meir komfortabelt. Andre settet er eigentleg mykje det same, men då ligg me i grunn eit par poeng bak veldig lenge. Men så kring 18 så dreg me litt i frå, og dei kontrollerar berre settet inn, fortel ein av trenarane Trine Sundfjord like etter kampen.

--Sjølv om dei tapte nokre ballar, så vann dei dei fort tilbake igjen. Dei var veldig kalde i hovudet heile vegen og spela kjempebra. Dei var rolegare enn motstandarlaget som spann mykje meir, og dei enda med å gjera ein del feil som dei vanlegvis ikkje gjer. Me pressa dei i serv og det vart nok ein litt vanskeleg jobb for leggarane deira, fortset Sundfjord.

Trenaren meiner også at «underdog»-stempelet dei har kan vera gunstig.

--Volda hadde heilt klart favorittstempelet her, då blir det mykje mindre press på oss om å vinna som «underdog». Då er det også desto kjekkare å vinna, og i grunn er det mest behageleg å vera «underdog». Me trivs i den rolla og kan godt halda oss der, understrekar ho.

Opprykksturnering

– For to år sidan møtte de også dette laget i finalen, men den gongen tapte de. Korleis kjennest det då å vinna i dag?

– Det er utruleg digg faktisk. Jentene var veldig lystne på den revansjen der, så dette var kjempekjekt. Jentene spelte heilt fantastisk og no er dei ganske glade og nøgde med eige spel. Dette var veldig bra, og me er kjempeglade alle mann, både spelarar, trenarar, foreldre og alle som kom for å heia på oss, ler ein strålande nøgd trenar.

Det er derimot ikkje lange pausen i vente, for allereie neste helg går turen vidare til Trondheim.

– No er det ein del av troppen som skal reisa til Trondheim for å bli med på opprykksturnering. Så det er i grunn rett på neste event, men eg trur me kjem til å ta dette med oss til Trondheim og nyta det undervegs. Det blir veldig kjekt, og eg trur dei kjem til å vera ekstra gira etter denne helga, seier Sundfjord.

Det var derimot ikkje berre på Strand-Ulv-laget som kunne skilta med kvinnheringar. Også motstandarlaget KFUM Volda hadde med seg ein kvinnhering, i alle fall ein halv ein. Frøya Keilen har nemleg ein far ved namn Åsmund som er frå Rosendal.

På laget i J17-NM:

Lilli Tuften Aksnes-Øystese

Merethe Eikeland

Maren Næss Våge

Iselin Nilsen

Fride Sofie Milde

Anne Pernille Nistad

Emma Sandvik Rødal

Marie Traavik

Silje Vik

Jenny H. Lie

Zuzia Ostrowska

Madeleine Lønning-Berland

Ronja Kirketeig

Julie Bjørkelund

Trenar: Trine Sundfjord

Lagleiar: Ingrid T. Sundfjord