Strand-Ulv til finalen i J17-NM
Etter klare sigrar i løpet fram til semifinalen, vart det eit tett og spennande oppgjer som venta når finalebilletten skulle delast ut.
Publisert
Sist oppdatert
– Det var ein heftig semifinale, smiler ei gira og stolt Trine Sundfjord etter at finaleplassen var sikra for Strand-Ulv.
– Me låg under med åtte poeng i opningssettet, tok time out-ar, oppmoda jentene om å mata på, og litt og litt åt me oss innpå Koll. Me vart veldig glade då 23-23 blei 25-23. Når ein møter eit såpass godt lag som dette, og veit at dei er gode, så ser det skummelt ut når ein ligg langt bak, vedgår Trine Sundfjord.
Annonse
Meisterskapen fram til semifinalen har stort sett gått på skinner for Strand-Ulv. Alle kampar har til no blitt vunne 2-0.
– Det har vore ganske kontrollert, alt i alt. I finalen møter me Volda, som slo oss i J15-NM-finalen for to år sidan. Me er sjukt revansjesugne mot Volda, samtidig som spelarane er rolege og fine, dei asa seg ikkje opp for noko. Det er veldig god stemning i laget, også hos dei som står på benken, seier Sundfjord.
Turneringa går i Haugesund, og kort veg for heiagjengen merkast for Strand-Ulv-laget.
– Me har mange foreldre med, og det er ein kjempebra heiagjeng som lagar mykje lyd. Me høyrer våre supporterar veldig tydeleg. Det er stas. Og me kjem heilt sikkert til å høyra dei under finalen også, sluttar Sundfjord før ho og spelarane hastar av garde til banketten.
