Strand-Ulv-jentene med storeslem i RM

Det var 17 lag påmeldt frå heile Hordaland fordelt på to klassar, gutar og jenter.

På jentesida stilte Kvinnherad med to lag, Strand-Ulv og Trio. Innleiande vann Strand-Ulv alle kampane sine 2-0 og toppa med det si gruppe. I same gruppe vann Trio éin kamp og tok med det 2. plassen.

I kvartfinalen knuste Strand-Ulv-jentene Sveio 2-0 (25-6, 25-4), medan Trio kjempa hardt i sin kvartfinale. Fyrste sett enda med tap 28-30, siste sett 15-25. Trio tapte dei neste kampane, men vann kampen om 7. plassen mot Sveio.

Strand-Ulv møtte TIF Viking i semifinalen og vann lett 2-0 (25-14, 25-10). Til slutt toppa jentene det med ein klar 2-0-siger også i finalen mot Framnes (25-16, 25-9). På Framnes spelte halvt hatlestrending Triana Kaelo Nerhus.

Det bør nemnast at Stand-Ulv stilte skarpskodd med erfarne spelarar, som mellom anna søstrene Næss Våge, Rødal og Aksnes-Øystese.

Gull og sølv

Korkje Trio eller Strand-Ulv stilte med gutelag, men det betyr ikkje at det ikkje var Kvinnherad-gutar å finna i Sotra Arena denne helga. Dei var til og med å finna i både finalen og bronsefinalen. I finalen kjempa varaldsøyningen Eirik Skjelnes med laget sitt TIF Viking og hatlestrendingen David Eikeland på Rossvoll. TIF viking vann 2-0 (26-24, 25-10). I tillegg spela herøysundingen Sjur Aasgard bronsefinalen for Kvernbit mot Framnes. Kampen tapte dei 2-1 (25-19, 20-25, 15-9).

Fyrste og andre plass er kvalifisert til NM, som skal haldast i Førde i midten av mars.

Trio sitt lag: Ariel Engelsen Øvrevik, Emilie Prestøy, Emilie Skjellevik Bjørsvik, Kaia Stusvik, Kristina Heimvik, Oline Skogseth, Thea Elise Eliassen, Veslemøy Stusvik. Trenar er Eirik Sævareid.

Strand-Ulv sit lag: Fride Sofie Milde, Jenny Lie, Madeleine Lønning-Berland, Silje Vik, Maren Næss Våge, Ronja Kirketeig, Emma S. Rødal, Mari Fagerlid, Lilli Aksnes-Øystese, Iselin Nilsen, Henriette Næss Våge. (Leah Hjortland og Anne Pernille Nistad var kun med laurdag). Trenar er Trine Sundfjord.