Strand-Ulv held sigersrekka gåande

Laget med unge spelarar frå Ølve, Hatlestrand og Varaldsøy har tatt 2. divisjon for kvinner med storm i debutsesongen. Halvvegs i sesongen kan førebels rekneskap gjerast opp, og det med siger i alle kampar til no.

To kampar har enda 3-2, noko som i seriespelet betyr to poeng til vinnarlaget og eitt til motstandaren. Den eine av desse var borte mot BTSI på laurdag.

– Me halte det i land til slutt, med 16-14 i siste settet. Det var det knappaste me har vore med på i år, og for så vidt så knapt det kan bli, seier trenar Trine Sundfjord om bortesigeren.

Betre enn venta

Dagen etter tok dei i mot Rossvoll på heimebane. Kvemmingane er blant dei fremste konkurrentane til puljesigeren. Likevel enda det med ein klar 3-0-siger til jentene.

– Me er kjempefornøgde. Me er halvvegs i serien, og står utan tap. Eigentleg hadde me ikkje sett for oss slik utteljing, for det er berre gitt vekk fem sett totalt i haust. Eg trudde kanskje me skulle måtta slita meir. Mot Rossvoll var jentene ganske gode, faktisk, seier Sundfjord til Grenda.

Spelargruppa ho rår over er i alderen 14 til 17 år, og Sundfjord meiner det er naturleg med litt ustabilitet, gitt alderen deira.

– Det er likevel meir stabilt enn det som er vanleg for denne alderen. Har hatt kampar der me har tatt ei tidleg leiing i settet, og klart å halda den utan å sleppa motstandaren innpå oss. No har litt sjukdom prega nokre av dei siste kampane, men likevel har det gått bra, seier trenaren som har vore innpå sjølv i eit par av dei jamne kampane.

– Berre nett for å gje litt moralsk og psykologisk støtte til jentene, forklarer ho og tonar ned eige bidrag til sigrane.