Straffebom, sjølvmål og raudt kort

– Me skulle hatt dette i eigne hender no. Det var ikkje noko stort lag me møtte, og alle resultata gjekk med oss, så det kunne vore eit veldig jafs i rett retning med tre poeng her, seier Trio-trenar Øystein Ersland etter at Nymark vann oppgjeret på Husnes Stadion med 2-1.

Alkan Abdula sendte Trio i leiinga før kampuret viste to minutt, men deretter var det slutt på at marginane vippa blåraud veg.

Skadar

Sander Lillesletten måtte ut med skade etter ti minutt, medan Emil Voster slo opp ein strekk. Mathias Hansen Eide fekk seg ein trøkk og måtte ut, men først etter at eit hjørnespark hadde sneia innom leggen hans og i eige mål. Alle desse hendingane kom i første omgang. For å komplisera biletet, hadde kaptein Åsmund Voster reist til fødestova i viktigare ærend enn 4. divisjonskamp tidlegare på kampdagen.

Andreomgang var heller ikkje prega av flyt for Trio. Omgangen var fem minutt gamal då ein feilpasning frå Isak Mo sendte Nymark aleine med Håkon Nes i Trio-målet, og 1-2 feil veg var eit faktum.

Det som skjer etterpå, er som når nokon tar med trekkspel i ei gravferd; vondt blir verre.

Deretter skulle vondt bli verre. Ein slapp Marcus Såtendal-straffe vart redda av Nymark-målvakta, og Eivind Saghaug fekk to gule kort på fire sekund.

Tredje for året

– Det var tredje straffbommen på rad for oss denne sesongen. Det er to kampar att, så det er framleis mykje som kan skje. Slik hausten har gått, så ser eg at 4. divisjon er greitt nivå for oss å leva vidare i, med den stallen me har disponibel no, seier Trio-trenaren.

10. plassen i den 12 lag store avdelinga, kan vera nok til å halda seg i divisjonen, men då trengst det meir flyt enn Trio opplevde på laurdag. Neste kamp er borte mot Lyngbø, som ligg to poeng bak opprykksplassen. I siste runde kjem tabelljumbo Odda til Husnes.