Storleg nøgd med opningshelga

Dagleg leiar for Fjellhaugen Skisenter Kent Are Kjørsvik Petterson er smått ekstatisk etter at dei to første dagane med ope skitrekk er gjennomført på strålande vis.

– Me har hatt mange kjekke gjester, og det har blitt gjort solid innsats frå dei frivillige, som har lagt ned om lag 140 timar dugnad i løpet av helga. Me fekk perfekt vêr og føre. Alt har berre klaffa, seier ein tydeleg nøgd Petterson

Runar Nordgaard er ein av dei frivillige som denne helga har stått på for at skitrekket skulle ta seg av alle som hadde lyst på ein tur eller fleire i bakken.

– Det er kjekt å sjå så mange kosa seg her, seier nordlendingen medan han svingar snøscooteren opp og ned alpinbakken for å sjekka at alpinistane har det bra.

Koste seg

Blant dei som brukte dagen med slalåmski på beina var trioen Trond Christian Skartveit (15), Aleksander Hellesøy (15) og Sander Enes (13).

– Dette er skikkeleg gøy, sa gutane på toppen av alpinbakken.

Trond Christian skulle i gang med sin første tur for dagen, medan dei to andre hadde fått noko meir omsetning på skiheisen. Det var året første dag i trekket for alle.

– Veldig kjekt at det er i gang, samstemte dei før nedfarten tok til.

Joakim Hellenes og Bjørn Martin Haugland hadde også kledd på seg og tatt seg til Fjellhaugen på søndag. Hellenes for å stå på snøbrett, medan Haugland hadde kledd på seg slalåmski.

– Dette er første gong i år, men me har jo alltid stått på ski her i Fjellhaugen, og det kjem me til å halda fram med, sa dei to.

– Eg nyttar anlegget her mykje, men ikkje kvar dag det er køyring. Laurdag var eg i Røldal og køyrde, men Fjellhaugen er jo nærare. Det at ein får til dette utelukkande basert på frivillig arbeid, er imponerande, skryt Hellenes og Haugland.

Vonar på ope trekk til helga

Parkeringsplassen var full av bil både laurdag og søndag, og det var ikkje ein ledig medbringar å sjå. Petterson vonar det held fram slik, og eit av grepa skisenteret har tatt, er å gje alle 4. klassingane i kommunen gratis årskort i skibakken.

– Me ynskjer å rekruttera nye brukarar av Fjellhaugen skisenter. Me håper det kan vera ein god måte å introdusera dei for ski og området her, og like mykje for å ta i bruk langrennsarenaen som alpinanlegget, forklarer Kjørsvik.

Han gledde seg også over at trekket fungerte slik dei ønskjer også.

– Det nye styringssystemet har fungert akkurat som det skal. Her skal me retta ei stor takk til Sparebankstiftinga, som har vore avgjerande for at me fekk det på plass, rosar skitrekkleiaren.

Dei forventar ein del snø i løpet av måndagen, og preppemanskapet skal i sving for å pakka mest mogleg før regnet kjem tysdag.

– Har me flaks så blir temperaturen litt lågare, slik at ikkje alt regnar vekk. Det må me nesten berre krysse fingrar og tær for. Det blir nok truleg ikkje kveldsope på onsdag med det regnet som er meldt, men helga er ikkje umogleg. Då er det meldt kaldt og snø igjen, oppsummerer Kjørsvik Petterson.