Stor juleoppvisning: – Idrettsglede og meistring

230 gymnastar med trenarar opna juleoppvisninga med vakker og rørande innmarsj til «Selmas Song». Med lommelykter og fin song var det ei magisk stund for alle frammøtte.

Det var spente turnarar som gledde seg til å visa kva dei hadde lært gjennom hausten.

– I dag fekk me sjå mykje idrettsglede og meistring frå gymnastar frå 2 år og oppover, seier Gry Hege Grønningen, leiar i turngruppa.

Auka medlemstalet

Ho legg til at dei har hatt fokus på at alle barn som ynskjer det skal få delta på turn.

– Me har auka medlemstalet vårt med 100 medlemmar berre i haust. Dei kjem spreidd frå heile kommunen, det syns eg er ekstra stas! Dette har me fått til fordi foreldre har stilt opp som trenarar.

Grønningen vil takka dei 55 trenarane som kvar veke legg ned eit stort arbeid for å gje eit tilbod til borna i Kvinnherad.

– Eg vil òg takka styret for det dei gjer for turngruppa. I dag er eg stolt av å vera ein del av turnflokken i Trio, avsluttar Gry Hege Grønningen.

Mange timar

Grenda spurde ein av dei 55 trenarane, Mette Aasen, om korleis ho tykte dagen hadde gått.

– Eg synest dette var veldig kjekt! Det var eit godt og flott arrangement. Veldig flott at alle hadde bortimot same løypa med nokre tilpassingar. Me er jo mange gymnastar, så det blei mange timar på enkelte. Men ungane synest det var kjekt, og ikkje minst stas å få visa fram kva dei kan, fortel ho.

Turnarane avslutta heile juleoppvisninga med ein felles dans, «Bli-Med-Dansen».

Tekst/foto: Sandra Herskedal Røssland