Startar opp skyteskule
Kvinnherad Skyttarlag går i gang med innesesongen med skyteskule for barn og unge.
Publisert
17. september går bokstavleg tala startskotet for haustens skyteskule i regi av Kvinnherad Skyttarlag.
– Er du fødd i 2014 eller tidlegare, så er dette kanskje noko du vil ha stor glede av å få med deg i haust, lokkar Leif Skeie hos arrangøren.
Annonse
Han er éin av dei åtte røynde skyttarane som blir med som instruktørar når skyteskulen startar oppi skyttarhuset på Seimsfoss. Eine halvparten tar seg av tysdagane og andre tar torsdagane.
– Me vrir litt på opplegget frå tidlegare semester, og deler elevane på to kveldar i veka, i staden for å ha 12 ferske skyttarar på same kvelden. Me trur det er meir igjen for det for alle, forklarer han.
Skyteskulen er berekna på nybyrjarar og ferske skyttarar, og skal gå over seks kveldar. Skyttarlaget held ammunisjon og materiell, og har våpen til utlån.
– Kvar kveld blir ei blanding mellom teori og skyting, og trygg våpenhandtering er noko av det viktigaste me lærer bort. Dette er ein sosial og kjekk aktivitet å ta til med no når regn og vind herjar ute, tykkjer Skeie i Kvinnherad Skyttarlag.
