Spurta til andreplass i gateritt

Gateritt føregår ofte i ei rundløype på alt frå éin km til eit par kilometer, gjerne i ein by der det er ein del publikum. Laurdag skulle damene sykla i 75 minutt, og deretter tre rundar.

– Dette er høg intensitet, stor fart, skarpe svingar, ofte brustein og glatt vegmerking som fotgjengarfelt. Ingeborg var lenge med i teten, men var uheldig og velta i ein skarp sving på den sleipe vegen. Ho kom seg på sykkelen igjen, og klarte å kjempa seg opp i hovudfeltet igjen. Men på den tida, hadde ein ryttar rykka frå hovudfeltet og sykla aleine i tet heilt til mål, forklarer trenar Per Korsvold.

Trass i litt skrubbsår, vann Ingeborg spurten i hovudfeltet og tok ein fin andreplass.

– Ingeborg er fornøgd så langt, og prøver nå å få varmen i seg medan ho pleier litt skrubbsår, kommenterer Korsvold etter søndagens ritt.

Nytt gateritt

Måndag var siste ritt, som går i ei liknande løype som søndag, men i 50 minutt pluss tre rundar. Hestad sykla ho inn til 5. plass.

– Ein litt sur 5. plass, ettersom ho låg på ein god 2. plass ein runde før mål. Det kan også seiast at det var damer med i dag som ikkje deltok dei andre dagane, og såleis hadde friske bein, rapporterer Korsvold.

Ingeborg Hestad er midt i ein treningsperiode, og har ikkje prikka inn noko formtopp til Stjørdal-turen.

– Denne helga indikerer at ho er blant dei beste i landet. Ho fekk merksemd og tilbod om overgang til storlag som satsar på damesykling. Dette har ho sjølvsagt ikkje tatt stilling til. Så langt har ho god støtte i Kvinnherad Sykkelklubb, som ho syklar for, seier Korsvold.

Hestad kjem heim frå Steinkjer med tre leiartrøyer i U23-klassen, og enten 2. eller 3. plass totalt i Norges Cup blant damer elite.

– Ho skal vera stolt av det! sluttar trenaren.