Spelar cupfinale på laurdag
Laurdag 18. januar er det klart for cupfinalar i volleyball. Nærast som vanleg med innslag frå Kvinnherad.
Ekeberghallen i Oslo er staden for volleyballinteresserte på laurdag. I kvinnefinalen skal TIF Viking frå Bergen møta ØKSIL frå Vesterålen. Tora Tuften Aksnes-Øystese (født 2001) frå Hatlestrand spelar på TIF Viking. Det same gjer Terian Kaelo (født 2002), som hadde deler av oppveksten på Hatlestrand.
TIF Viking sin veg til cupfinalen ser slik ut:
Artikkelen held fram under annonsen.
Åttandedelsfinale: BSI – TIF Viking 1-3 (14-25, 24-26, 25-22, 21-25)
Kvartfinale: TIF Viking – Koll IL 3-0 (25-20, 25-15, 25-11)
Semifinale: NTNUI – TIF Viking 1-3 (23-25, 21-25, 25-22, 15-25).
Bergenslaget har vist toppform i forkant av finalen. På søndag vann dei 3-1 over sterke Randaberg, og er nummer to på tabellen. Serieleiar er finalemotstandaren ØKSIL, som ligg fire poeng framfor. Men Viking har éin kamp til gode.
Låg under 2-0
Det må nemnast at TIF Viking og ØKSIL møttest til seriekamp i Vesterålen den 4. januar. Då var det gjestene frå Bergen som sigra 3-2, dette etter å ha lege under 2-0. Settsifra vart 25-18, 25-23, 20-25, 20-25, 9-15.
Alt ligg såleis til rettes for ein svært spennande og jamn finale.
– For ein kamp vi kjem til å få, skriv TIF Viking på Facebook.