Sonesamling med rekordstor kontingent av 13-årsjenter frå Rosendal TL.
Publisert
Den årvisse sonetreninga har endeleg tatt opp tråden att, og på laurdag hadde fotballspelarane frå 2008-kullet si første sonesamling for sommaren.
Denne fann stad i Rosendal, og var for jenter og gutar i indre Sunnhordland. Det var i år ei historisk deltaking av dyktige jenter frå Rosendal sitt J13 lag.
Annonse
Kunstgrasbana var fylt opp av fotballtalent frå klubbane Halsnøy, Odda, Uskedalen, Trio og Rosendal. På listene var det oppført 39 spelarar, men nokre av desse var ute med skade. Der i blant Ingeborg Skjelnes, som var ute med kneskade. Ho håpa likevel ho ville få moglegheit å delta på neste samling, som er allereie førstkomande laurdag. Sjølv om ho ikkje fekk delta denne dagen, rekna ho med å få utbyte av å følgja med frå benken.
Medan spelarane øvde på teknikk fortalte Arvid Nes i fotballgruppa til Rosendal om deltakinga av jentene tilknytt klubben.
– Ein kan i utgangspunktet berre nominere fem spelarar frå kvar klubb. Men her er det to ute med skade, og dersom det er særleg dyktige spelarar kan ein få nominere fleire dersom det er plass. Frå Rosendal er det ni jenter på lista i år, og det er historisk, slo han imponert fast.
Emilie Sandvik Aaseth og Helene Hus Hansen, begge frå Omvikdalen, tok seg tid til ein kort prat med Grenda innimellom teknikkdrillane. Dei var glade for å få bli med.
Annonse
– Ein får jo spelt i lag med dei beste spelarane frå området, og då få ein ekstra utbytte av treninga, slo Helene fast.
Ho var ei av dei som hadde fått plass på samlinga då nokre av klubbveninnene var ute med skade. Emilie hadde tidlegare vore på ei liknande samling i Bergen.
– Det er kjekt å delta på slike samlingar for ein lærer ein del nytt, smilte ho.
Dagens første økt gjekk med til teknikk, og i siste økt fekk dei unge talenta spela kampar. Eivind Nissestad var leiar for samlinga, som er meint å vera gje ekstra trening til dei aller ivrigaste fotballspelarane frå 2008-kullet. Eit utval av deltakarane vil etter dei to samlingane bli valt ut til eit sonelag for Sunnhordland.
