Slått av gamlelaget i Movistar-debuten

Vårsesongen i toppdivisjon av Zwift vart tråkka i gang tysdag kveld. Då med Vidar Mehl i Movistar sine klede for aller fyrste gong.

Sesongen starta med ein lagtempo i løypa Douce France på Zwift. Etter 25 tøffe kilometer, sykla Movistar-laget i mål til ein 6. plass i sin Zwift Premier Division-debut, tre fattige sekund bak Vidar Mehl sitt tidlegare lag, Kalas eSport Racing Team.

Tung dag

– Eg hadde ein litt tung dag, men eg gav alt og køyrde til det var tomt, slik ein skal på ein lagtempo. Dette var første gong vi køyrde skikkeleg saman som eit lag, og vi kjenner ikkje kvar og ein sine styrkar heilt endå. Ein må læra å kjenna kvarandre før ting flyter heilt av seg sjølv, så ut i frå det synest eg vi gjorde det veldig bra, seier Mehl til nettstaden Landevei.no etter debuten.

Men sjølv om både Omvikdelingen og det spanske verdscup-laget var nøgd med debuten, var det ikkje berre kjekt å sjå seg slått av tidlegare lagkameratar.

– Det svir så klart litt at Kalas slår oss med tre sekund, men det skal eg leva med. Det er moro at Kalas gjer det godt, så eg depper ikkje over det, seier han til nettstaden.