Skyttarfamilien klar for LS

Hatlestrand og Ølve skyttarlag er sterkt representert på Landsskyttarstemnet. Ein familie syt åleine for seks deltakarar.

 

Landsskyttarstemnet, som i år vert arrangert på Evjemoen i Aust-Agder, starta for fullt i går. På standplass finn ein mellom anna 55 år gamle Harald Haavik frå Ølve. Men han er slett ikkje den einaste frå familien som skal i aksjon. Også sønene Viljar (24), Svein Gunnar (21), Torbjørn (19) og Andreas (17), samt sambuar Elin Håvik (40), har sikta seg inn på Landskyttarstemnet.

Grenda møter dei inst i den idylliske Håvikjo. I huset som ligg heilt i sjøkanten har alle karane i familien vakse opp. Svein Gunnar og Torbjørn bur der no. I bygninga frå 1908 har det gjennom åra vore telefonsentral og butikk.

 

To campingvogner

Harald er nett komen heim frå jobb i Nordsjøen.

– Eg byrja med skyting då eg var 12 år. Det var ein av våre mest kjente skyttarar, Hans G. Tufta, som drog meg med. No har eg drive med denne idretten i 43 år. Etter kvart vart det naturleg at også desse karane vart med. Det har alltid vore kjekt å driva med skyting, men ekstra kjekt då dei òg byrja, smiler Harald og tenkjer på gutane sine.

Harald har også lang erfaring som administrator i Hatlestrand og Ølve skyttarlag, både som leiar, ungdomsleiar og noverande nestleiar. Sambuaren Elin, som har sitt Håvik-namn frå Fusa, skaut litt i barndomen, men har vore mest aktiv dei fire siste åra.

På Evje skal familien bu i to campingvogner.

– Vi har alltid budd i campingvogn, med unnatak av dei to siste åra då vi leigde hus. Det var fint med hus, men no er vi altså tilbake i campingvognene, seier Harald.

På campingplassen vert det sjølvsagt mykje sosialt samvære, spesielt med tanke på at Hatlestrand og Ølve skyttarlag sender av garde 24 deltakarar. Harald trur laget med det er 25. størst av alle dei 506 laga som er representerte på Landsskyttarstemnet. Dei er i alle fall størst i Kvinnherad, mogleg også i Sunnhordland.

 

Ingen ambisjonar

Familien Haavik/Håvik har ikkje store ambisjonar med tanke på resultatlistene.

– Eg trur helst eg blir listefyll. Det var litt meir alvor før, melder Svein Gunnar, som til vanleg er teknisk teiknar hjå Ølve industrier.

Men faren tykkjer avkommet er noko smålåtent.

– Du har alltid vore ein god feltskyttar, og har jo gode minne frå førre gong stemnet var på Evje. Då skaut du rekrutt, og var nummer 3 med 349 poeng etter minneskytinga. Du var berre éin treff unna finale på feltrunden, opplyser Harald, som avslører at han har stålkontroll på årstal og poeng.

Heller ikkje skuleeleven Andreas har særlege forventningar på eigne vegner.

– Eg er med berre på gøy, slår han fast.

Igjen trer faren støttande til.

– Han var i finalen på felt på Lesja for fire år sidan, smiler han.

Torbjørn, som går i lære som gravemaskinførar på Austlandet, har på si side to finalerundar i feltskytinga å skilta med, men er forsiktig i førehandsomtalen.

– Det er berre for å ha det kjekt eg er med, seier han.

– Men han har leiinga i familien med sine to finalar, humrar Harald.

Eldstemann Viljar er student i Oslo, og er ikkje med på praten. Dermed vert det Elin sin tur til å forkynna at ho skal vinna Kongelaget og Stuparen. Eller kanskje ikkje.

– Målet er å gjera det betre enn i fjor. Så eg har mest ein konkurranse med meg sjølv, informerer Elin, som er tilsett hjå Ølve industrier.

– Uhyre kjekt at ho vil satsa, og ikkje minst kjekt at vi kan gjera dette i lag, supplerer Harald.

 

Leia LS

Harald Haavik legg lista høgast av alle, sjølv om det neppe er veldig seriøst meint.

– Eg vil leia Landsskyttarstemnet igjen, slik eg har gjort éin gong før. Eg tok nemleg leiinga på Elverum i 2010. Då skaut eg i det fyrste laget, og med 239 poeng var eg best der. Dermed var eg i teten i ein halv time. Alle blir imponerte når dei høyrer at eg har leia Landsskyttarstemnet, og tenkjer at «han må vera steikje god», ler Harald.

Når Grenda spør om nokon av dei har lagt seg i selen i det siste og auka på med treninga, er svara like avslappa.

– Nei, men det er kanskje på tide å skyta inn børsa, seier Svein Gunnar til latter rundt bordet.

Torbjørn opplyser derimot at han har skote litt innandørs i vinter, og etter påminning frå faren vedgår han at det også har blitt noko felttrening.

Om det ikkje skulle bli fullklaff for familien Haavik/Håvik, er det andre frå Hatlestrand og Ølve som kan finna på og hevda seg. Harald meiner publikum må sjå opp for Ingebjørn Lønning i V55 og Knut Dalland i V65. I tillegg har ein Øyvind Lønning, som rett nok no representerer Åsane/Hordvik skyttarlag.

– Han har skote veldig bra i sommar. Vi kan òg nemna Kristian Djuvsland. Han er over 80 år gamal, og har vore med på Landsskyttarstemnet i alle fall i 70 år. Sjølv om han kunne skote i klasse V73, har han valt å delta i V55, for han likar den utfordringa det gjev, seier ein imponert Harald Haavik.

 

Sandvolley-NM

Det viktigaste med Landsskyttarstemnet er uansett atmosfæren og det sosiale.

– Ikkje minst det å vera samla med andre frå same klubb og med folk frå andre klubbar, som til dømes Kvinnherad, Stord og Tysnes. Vi blinkar oss ut kor tid folk vi kjenner skal skyta, og går på stadion og heiar på dei, seier Harald, som har tenkt å vera på Evje heilt til stemnet er ferdig.

Men familien har også andre spennande konkurransar å følgja med på. For då dei reiste frå Ølve allereie på måndag, vart kursen sett mot Oslo. Denne veka vart nemleg Norgesmeisterskapen i sandvolleyball arrangert der. Blant deltakarane var Elin Håvik si yngste dotter, Mia. Ho spelar i klasse U15. Det må òg nemnast at eldstedottera, Linn Amalie, for nokre år sidan vart Hordameister i skyting.

Sola steikjer i Håvikjo, og kanskje byrjar også tanken på det føreståande Landsskyttarstemnet å varma.

– Vi skal opp på banen og trena seinare i kveld. Men vi må venta til sola har gått ned. Sjølv om vi er ein gjeng som deltek for å ha det moro, så kjem konkurransenervane uansett, opplyser Harald Haavik.