Skaut seg vekk: - Eg trur eg feilvurderte vinden litt

Ragnhild Femsteinevik frå Hatlestrand var ei av fem norske som fekk gå normaldistansen. Øvinga består av 15 kilometer langrenn iblanda fire skytingar. Det var ikkje strafferundar, i staden vart det lagt til eitt minutt på totaltida for kvar bom.

På fyrste liggjande starta det frykteleg dårleg for Ragnhild. Begge dei to fyrste skota hamna utanfor blinken. Til slutt vart det tre tilleggsminutt, og ho gjekk ut frå standplass som nummer 83 av dei 90 startande.

På andre liggjande var det heldigvis berre éin bom. Ho avanserte då til 62. plass, men var heile 4.01 bak leiaren. Så var det klart for fyrste ståande. Her viste Ragnhild solide takter, og nøya seg med éin bom endå ein gong. Dermed tok ho ytterlegare nokre steg oppover lista, til 52. plass.

Vart usikker

På siste skyting vart det to bom, og Ragnhild Femsteinevik falt ned til 58. plass. I mål enda ho som nummer 55. Verdsmeister vart svenske Hanna Øberg, heile 7.26 føre Ragnhild.

– Eg trur eg feilvurderte vinden litt, så eg kom ut høgre. Eg skrudde eitt og så to, men det vart bom likevel. Eg blir litt usikker når eg bommar, og så vert det nokre dårlege avtrekk i tillegg, sa ho om fyrste skyting til NRK etter løpet.

Ragnhild følte seg likevel roleg då ho kom inn på standplass.

– Eg veit ikkje om det var vinden eller om eg var anspent, men det øydelegg heile løpet med tre bom på fyrste, så det var kjipt, la ho til.

Stafetten

NRK spurde naturleg nok også om kva resultatet får å seia for stafettuttaket på laurdag.

– Eg la vel ikkje inn den beste søknaden i dag, men eg får håpa dei legg vekt på kva eg har gjort tidlegare i år, smilte Ragnhild.

Ingrid Landmark Tandrevold vart best av dei norske på 11. plass. Ida Lien vart nummer 17, Karoline Knotten nr. 21 og Juni Arnekleiv nr. 79.