Skaut seg til finale – men måtte på jobb

Onsdag føremiddag ringte Grenda til Sigmund Våge for å intervjua han føre finalen i stangskytinga. Men når vi spør om det høver, eller om han er oppteken med førebuingar, seier han:

– Eg er ikkje i Steinkjer, eg er på jobb.

56-åringen som opphavleg er frå Varaldsøy, men no bur i Åsane, har hatt ein svært solid skyttarkarriere. Krona med sigeren i stangskytinga på Landskyttarstemnet i 2003, då han slo Tor Harald Lund etter omskyting. Den gong fekk Sigmund Våge 25 treff i finalen og 21 i omskytinga. For dei som lurer, kan vi opplysa at stangskyting handlar om å få flest mogleg treff på to figurar i løpet av to omgangar på 25 sekundar. Du kan skyta så mange skot du berre maktar.

Sigmund har slett ikkje gløymt gamle kunstar, for denne veka slo han til med 26 treff. Det var klart best i klasse v55, med heile fire treff meir enn nestemann. Det var også 11. best av alle deltakarane. Denne plasseringa delte han med nemnde Tor Harald Lund, som har vore skyttarkonge fleire gonger. Dermed skulle Sigmund skote i finalen, men slik blir det ikkje.

Kan ta gull

– Er det bittert å gå glipp av finalen?

– Eg låg jo godt an, men visste på førehand at eg måtte reisa viss eg kom til finalen. Kollegaen min skal på ferie til Filippinane, så vi hadde avtalt at eg skulle avløysa han no. Difor gav eg beskjed til Landsskyttarstemnet om at eg ikkje kunne vera med i finaleskytinga. Eg skulle jo ynska eg kunne vore der oppe, men eg får heller koma sterkare tilbake neste år på Kongsberg, fortel Sigmund.

Uansett er han nøgd med 26 treff, noko som resulterte i beger og gåvepremie.

– Eg var berre ute etter å skyta godt og kanskje vinna eit beger. Men eg hadde faktisk 29 treff i Norgescupen for berre nokre dagar sidan, og har tidlegare greidd 30, seier han.

Sigmund Våge fekk også beger for innsatsen i felthurtigskytinga («stuparen»). Han brukte 10,52 sekundar på å treffa dei tre blinkane. Han har elles stor tru på at det kan bli meir heider til Varaldsøy, for Anders Johnny Kjærevik skal springa finale i 6 kilometer skogsløp på torsdag. Etter kvalifiseringa ligg han 3 minuttar bak leiaren.

– Anders er så god at han kan ta igjen 30 sekundar per kilometer på kven som helst. Eg trur han kan gå til topps, vurderer Sigmund Våge.

Kaptein

På Landsskyttarstemnet deltok ni skyttarar frå Vareld. Også på jobb er Sigmund Våge i tett kontakt med folk frå Kvinnherad. Han er nemleg kaptein på «Norwegian Gannet», eit flytande slakteskip for oppdrettsfisk. Då Grenda snakka med han var fartøyet på veg ut frå Hirtshals i Danmark. Om bord var også 1. styrmann Sindre Landa, overstyrmann Kjell Rune Gausvik og matroslærling Sigve Haukenes. På eit anna skift er Adrian Aksnes-Øystese matroslærling.