– Ein klubb med høge ambisjonar

Tina Abdulla opplever stor suksess med Storhamar for tida. Samstundes har det ei stund vore klart at dette er hennar siste sesong ved Mjøsa si bredde. Onsdag skriv den danske toppklubben Odense på deira heimeside at dei er Tina sine nye arbeidsgjevar. Høgre kant-spelaren frå Husnes har skrive under ein 3-årsavtale gjeldande frå sommaren.

– Tina kjem med Champions League-erfaring i bagasjen. Det har vore viktig for oss å finna ein spelar som har høg kvalitet, mot og fart – her passar Tina perfekt inn i likninga. Tina er ein driftssikker spelar som har vore vane med å spela tilnærma full tid i sin noverande klubb Storhamar. Hjå oss skal ho vera makker med Andrea Aagot på høgre kant. Eg er overtydd om at det blir eit kompaniskap som vil bidra til å utvikla begge spelarane ytterlegare over dei næraste mange år, og samtidig veit vi at vår høgre kant er i gode hender, seier sportsdirektør i Odense Håndbold, Trine Nielsen, til nettsida.

Stolt og audmjuk

Tina Abdulla gler seg til å skulle spela i Odense Håndbold.

– Eg er stolt og audmjuk over å få lov til å spela i Odense dei neste tre åra. Det er ein klubb med høge ambisjonar, og eg gler meg til å vera ein del av det. Eg håpar at eg kan vera med og bidra med mine kvalitetar til å ta nye skritt saman, er ho sitert på.

Tina Abdulla er opphaveleg frå Skopje i Nord-Makedonia, men vaks opp på Husnes. Ho har spelt i Storhamar Håndball sidan 2022. Før det spelte ho hjå tyske Borussia Dortmund.

I Storhamar har Tina vore med og kvalifisera dei til EHF Champions League-gruppespel to gonger. Odense er topplaget i Danmark saman med Esbjerg, og er såleis eit steg opp frå Storhamar.