Sindre med ny løyperekord i Åkraløpet
Det er lov å vera sliten etter målpassering når du har pressa din eigen løyperekord ned 11 nye sekund.
Publisert
Sist oppdatert
Sindre Omvik høvla laurdag ned nye sekund på sin eigen løyperekord i Åkraløpet, det vel tre kilometer lange løpet rund bygda til vegs ende i det søraustlege hjørna av Kvinnherad. Han hadde skjema på det førre rekordløpet frå 2019 å gå etter.
– Eg kneip fem sekund på første kilometeren, stigninga opp. Den neste kilometeren gjekk i lik fart som i 2019, men så klarte eg å ta seks sekund på bakkane nedover frå to kilometer å inn, fortalte 30-åringen etter at han hadde fått pusten nokolunde tilbake.
Annonse
Då kunne han konstatera at 9,16 er den nye rekorden.
Johannes Heien (35) kom nærast Omvik , men måtte sjå seg slått med nær halvanna minutt av omvikdalsekspressen. Unge William Samland Eik (15) tok tredjeplassen, etter å ha forbetra si eiga tid frå i fjor med eitt minutt, ned til 11,44.
I år igjen kunne arrangørane bak Åkraløpet klappa seg sjølv på skuldra og smila nøgd over god deltaking. Regn og gråvêr skremde ingen av dei 102 i trimklassen frå å gå runden, medan dei 34 i løpsklassen vart jaga av garde med 21 smårollingar frå barneløpet halsande like bak dei.
– Me må vera nøgde med dette. Oppslutninga er god, og ny løyperekord er alltid kjekt å få, sa primus motor for løpet Kurt Reidar Jegteberg etter løpet.
Annonse
Premieutdelinga vart gjort i gymsalen, grunna eit småguffent vêr. Der fekk dei jubilerande deltakarane sine velfortente heidersteikn, både for 25, 20, 15 og 10 gongers deltaking i Åkraløpet.
