Sikra semifinalebilettar i sandvolleyball-NM

– Me har det veldig gøy, fortel Lilli Tuften Aksnes-Øystese og Emma Sandvik Rødal på telefon frå hovudstaden.

Onsdag morgon vann dei 1/8-finalen 2-0, som er same siffer som dei vann alle sine innleiande kampar med. Slik sikra dei med det billett til kvartfinale seinare på dagen, og med ny siger der blei det semifinalespel på torsdag.

Heile denne veka er sett av til sandvolleyball. Frå tysdag til torsdag går 15- og 19-årsklassane, medan fredag til søndag er det 17-årsklassen og seniorane som skal i elden.

Dei fleste av 15-åringane skal tevla vidare i 17-årsklassen etterpå, slik som mellom anna 14-åringane David Eikland og Eirik Gjuvsland Skjelnes. Onsdag morgon tok dei sin tredje strake 2-0 siger, og som klubbvenninnene Lilli og Emma tok dei også seg til kvartfinalen seinare på dagen.

– Det var ein heilt grei kamp i dag tidleg, men me var litt trøtte, for det var ein tidleg kamp. Me vann greitt, og skal no spela mot nokon Gneist-gutar eg kjenner. Me kan slå dei, og håper på finale seinare, seier Eirik før kampen.

Dei tapte rett nok sitt første sett i årets NM, men slo seg likevel til semifinale torsdag morgon med 2-1 siger.

Men det er ikkje berre det sportslege som er gjevande for spelarane.

– Det skjer mykje sosialt, og me treffer folk som me har blitt kjent med, understrekar Aksnes-Øystese og Sandvik Rørdal som er med på sitt andre NM, trass i deira unge alder.

Strand-Ulv-spelarar:

G19: Jens Aasgard og Eirik Kirkhus Lysen

G19: Lars Kristian Ekeland og Simon Steen Evensen (Torvastad)

G 19: Fredrik Nistad og Elias B. Johansen

J19: Mari Svendsen Fagerlid og Siri Aasgard

J19: Henriette Næss Våge og Alexandra Isabel Eidem Molina (Strandvik)

J19: Mona Mi Silke og Lone Sofi Silke

J19: Stine Næss Våge og Malin Kristiansen

J15: Ronja Kirketeig og Maren Næss Våge

J15: Lilli Tuften Aksnes-Øystese og Emma Sandvik Rødal

G15: David Eikland og Eirik Gjuvsland Skjelnes