Sikra seg sponsorkontraktar og uniformerer idrettslaget
Denne veka byrja Uskedal Idrettslag utdelinga av nye drakter til sine utøvarar. Det markerte samtidig eit stykke nybrottsarbeid for klubben.
Publisert
Sist oppdatert
– Tidlegare har det vore slik at kvart lag på sett og vis har ordna seg sjølv. Dermed har klubbdraktene sett ulike ut frå lag til lag. No uniformerer me idrettslaget. Fotball, langrenn, friidrett får same utsjånad og sponsorar, seier Per Korsvold og Gina Hella Berge-Soldal.
Klubbkjensle
Annonse
Draktsponsorar er signerte for tre år, alle saman. Det gir klubben ei stødig årleg inntekt, som jo alle idrettslag er glade for å ha. Dei lokale bedriftene Brødrene Hjønnevåg, Brødrene Musland Maskin og Spar Uskedalen får selskap av SR-Bank.
– Dette er litt nytt for oss, og det har vore mykje som måtte ordnast, trass i at det ikkje er noko hokus pokus i dette, kommenterer Korsvold medan han og Berge-Soldal deler ut draktene.
Idrettslaget har sett av summar til å subsidiera treningsklede til barn, slik at dei kan kjøpast veldig billig.
– Me vil at alle barna skal kunna ha same treningsklede som lagkameratane, og vera ein del av flokken med like klede. Me ynskjer å gjera dette så rimeleg i innkjøp at ingen skal føla dei blir utelatne, og trur det vil hjelpa veldig på klubbkjensla og følelsen av å vera del av eit lag, forklarer Gina.
Annonse
Vedlikehald
Fleire av sponsorane møtte fram til avdukinga av dei nye draktene, noko som var rett og rimeleg gitt at dei tilfører nærare 100.000 kroner til klubbkassen.
– Noko av summen er øyremerka drakter, saman med løyvinga me fekk frå Sparebank1-stiftinga Kvinnherad, seier Korsvold, som likevel understrekar at om Uskedalen er ein liten klubb i medlemsmasse, så har dei store anlegg å ta seg av.
– Me har grasbane og løpebane på Heio, kunstgrasbanen her med omkringliggjande apparat og me har idrettshallen, og det betyr store utgifter til vedlikehald av anlegg. Desse sponsormidlar blir også brukt der, ikkje berre på drakter og klede, forklarer Korsvold og Berge-Soldal.
– Me ynskjer jo mange medlemmer i idrettslaget, men ser at det er litt mange som ikkje har betalt medlemskontingenten. Om det er familiar eller barn som ikkje har råd til å løysa ut kontingenten, så har klubben ei ordning i lag med kommunen som gjer at ein kan få dekka det. Då er det berre å ta kontakt med meg, seier Per Korsvold.
