Sikra NM-billetten etter suverent meisterskap
Det sterke jentelaget til Strand-Ulv tok ein suveren siger i årets regionsmeisterskap. Det betyr at laget kan byrja å førebu seg på NM i Ålesund til våren.
Publisert
Sist oppdatert
Laurdag gjekk laget gjennom innleiande kampar med tre 2-0-sigrar, og direkteplass i semifinalen søndag. Semifinalen vart ein parademarsj, med 25-6 som settsiffer i begge setta. I finalen på Sotra slo dei TIF Viking 25-8 og 25-20.
– Jentene har ikkje tapt eitt sett, og har full kontroll. 2. divisjonsmatchinga har vore til stor nytte for dei yngste, medan dei som er vekke på vidaregåande får si matching på godt nivå der. Fasit er at me har 12 spelarar i troppen som alle kjempar om ein plass i start-seksaren, seier Kim Røssland, som trenar laget saman med Ole Femsteinevik.
Annonse
Siktar høgt
– Det var nok ei overbevisande turnering frå jentene si sider, der me bruker heile troppen. Landslagsspelar Lilli Aksnes-Øystese var på benken i finalen, til dømes. Det skal verkeleg bli artig i NM, smiler Røssland.
Som finalist i regionsturneringa var Strand-Ulv sikra billett til NM i Ålesund tidleg i mars.
– Me reiser med same troppen som var med i helga. Kampane i går og i dag har me brukt til å testa ut ulike kombinasjonar. Det er vanskeleg å samla heile gjengen grunna skulegang, og denne helga blei i praksis første samlinga på ei stund. Me siktar høgt i NM også, og skal bita godt i frå oss der, sluttar Røssland.
