Såg Tina overkøyra gamleklubben

Onsdag kom Tina Abdulla og Storhamar til Åsane for å møta Tertnes, klubben Tina spelte for i ei årrekke før ho blei proff i tyske Borussia Dortmund. Kvinnherad Handballklubb reiste med sine jentelag frå 13 til 16 år for å sjå kampen, og kom heim att med stjerner i augo.

– Det er alltid kjekt å sjå handball på dette nivået der, men Storhamar gjorde det ikkje så spennande, for dei køyrte over Tertnes, smiler Dagfinn Gjerde etter turen.

Kjem og trener

– Tina Abdulla lurte på om det var kjedeleg å sjå dei, sidan Storhamar var så mykje betre enn Tertnes, men me brydde oss ikkje om det. Det vart ein kjempekjekk tur, og me fekk sjå at det var klasseforskjell på laga, seier Gjerde til Grenda.

Han og jentene fekk ein kjapp prat med Tina etterpå.

– Ho er ei stjerne. Me fekk gjort ein avtale om at ho skal ha treningsøkter med eit par lag når ho kjem heim til jul. Me set stor pris på at ho vil gjera det, legg Gjerde til.

Viste igjen

Storhamar, med Tina Abdulla frå start, stupte ut av startblokkene, og leia

12-4 før kampen var eit kvarter gamal. Dei sleppte aldri grepet på kampen, og 22-12-leiinga til pause enda på 25-44 til full tid. Tina noterte seg for fire mål mot gamleklubben.

– Me gjer ein veldig god kamp. Me forstyrrar rytmen deira og gjer det vanskeleg for dei å spela sitt spel, så eg er nøgd, sa Tina til Storhamar si Facebookside etter kampen.

Men det var ikkje berre Storhamar som merka seg ut i Åsane denne onsdagskvelden.

– Me beit i frå oss lydmessig, og KHK viste godt igjen på tribunen, smiler Gjerde etter turen.

Han ser at turen er viktig sosialt for jentene, og at det byggjer både lag og klubb.

– Det som er så flott er at når me får hjelp av Sparebank1-stiftinga Kvinnherad til utstyr og slikt, så kan me bruka andre av pengane våre til slike tiltak som dette. Me skal til Norway Cup med tre handballag til sommaren, og dugnadane for å finansiera det er allereie i gang