Reiser til NM med merkelappen «blant Norges største talent» på seg
Kvardagane bruker Lilli (16) i Sand for å bli ein best mogeleg volleyballspelar. Den komande helga bruker ho til å koma langt i NM med klubbvenninnene i Strand-Ulv.
Publisert
Sist oppdatert
I februar hadde Dagbladet ei omfattande kåring av dei største talenta på den norske volleyballparketten. Yngst på lista over dei ti mest lovande jentene var Lilli Tuften Aksnes-Øystese.
«Den neste store»
Annonse
Dagbladet hadde snakka med trenarar, spelarar og ekspertar, og varta opp med denne vurderinga av 16-åringen:
– Aksnes-Øystese blir snakka om som den neste store. Er på juniorlandslaget allereie, der ho speler med spelarar som er tre år eldre enno ho, og bankar på allereie på døra til A-landslaget.
Liberoen er ikkje blant dei høgaste, men tar det igjen med å vera rask, ha god speleforståing og bra fotarbeid. Aksnes-Øystese er spesielt god defensiv, samt på mottak. Det er sjeldan ein har sett nokon ha så gode dugleikar så ung, er oppsummeringa Dagbladet gjer av kvalitetane hennar.
– Veldig gøy, og stas å bli sett og lagt merke til, vedgår Hatlestrand-jenta.
Annonse
Ho går første året på vidaregåande i Sand.
– Det er ein av dei beste plassane å vera viss du vil utvikla deg som volleyballspelar. Eg spelar i toppserien for TVN (Topp Volleball Norge), og får kamptrening på øvste nivå, forklarer Lilli.
Mange med god matching
Førre veke var det vinterferie, og ho fekk med seg tysdagskampen til Strand-Ulv mot BSI 3. Då det søndag var kamp mot Sotra, var Lilli på veg til Sand. Onsdag gjekk turen heim igjen, og torsdag flyr J19-laget til Strand-Ulv til Ålesund. NM startar fredag.
– Me har fått ei tøff pulje, og har blitt slått av nokre av dei frå før i NM. Eigentleg så har me alle blitt eitt år eldre. Me reiser med 12 spelarar og har ein stabil gjeng. På laget har me sju jenter som alle får matching i 1. divisjon eller på høgare nivå, fortel Lilli.
I tillegg har Strand-Ulv styrka seg med spelarar frå Strandvik og andre klubbar, og det har styrka oss.
Annonse
– Det er mange gode lag, men eg trur me har god sjans. Gjer me det bra i puljen, så seier det mykje om kor me er før sluttspelet, vurderer ho.
Volleyballspelarar frå heile landet kjem til TVN på Sand for å gå på vidaregåande. U19-NM blir å rekna som klassefest for dei.
– Eg kjem til å møta alle på skulen på NM. Det blir koseleg å møta kjensfolk der, smiler ho.
Til liks med dei fleste har ho også alderen til å få med seg J17-NM, som går etter påske.
– Det går akkurat. I slutten av påsken er det først landslagssamling, så til Austerrike på precamp, deretter til Portugal for andre runde i EM-kvaliken. EM har start 5. april, så eg rekk akkurat U17-NM helga etterpå, sluttar Lilli.
