Regionslaget fullt av Strand-Ulv-spelarar

Frå 1. til 3. juli blir NM i sandvolleyball for regionslag i 17-årsklassen arrangert på Randaberg. Dit skal ein haug med spelarar frå Strand-Ulv delta, trass i at troppane frå dei ulike kretsane berre får ta med seks jenter og seks gutar. Hordaland har tatt med Emma Rødal, Lilli Aksnes-Øystese, Lone Sofi Silke og Siri Aasgard til å representera jentene, medan David Eikeland og Eirik Skjelnes er tatt ut på gutelaget. Dei får mellom anna Gneist-spelaren Jonas Øye Tangerås som lagkamerat. Han har relativt tunge slektsaner til Kvinnherad, med mor frå Varaldsøy og far frå Hatlestrand.

I fjor vann Hordaland jenteklassen med Mari Svendsen Fagerlid, Siri Aasgard og Lilli Aksnes-Øystese på laget. Det to sistnemnde får altså sjansen til å forsvara gullmedaljen. For gutane var Fredrik Nistad med og tok bronse i fjor.

Når regionslag møtest i sandvolleyball, konkurrerer dei seks uttatte spelarane parvis mot andre regionar. Kampane blir spelte nesten som ein femsettskamp, og kampen er ferdig dersom stillinga i sett er 4-0 eller 3-1 til eitt av laga. Trenaren skal byta inn nye spelarar i kvart sett, slik at alle seks spelarane har spelt minst eitt av de fire setta. Dersom det står 2-2 i sett etter fire spelte sett, skal det spelast eit golden set til 15 poeng. Då kan trenaren velja kva to spelarar som skal spela dette, uavhengig av kven som har spelt saman tidlegare i kampen.