Re-opna sandvolleyballbane i Åkra

Pinsa er ei travel tid i Åkra, med både Åkraløpet og kyrkjesundag med roing til bygda. Parallelt med Åkraløpet plar idrettslaget også å arrangera sandvolleyturnering. I samband årets turnering var det også tid for å markera ei omfattande oppgradering av banen.

– Me har fått god støtte frå Sparebank1-stiftinga Kvinnherad for å oppgradera banen, og har fått både ny sand og nytt nett, forklarte Sjurd Tjeldflåt til Grenda før finalekampane i turneringa.

Ordførar Hilde Enstad fekk æra av å stå for snorklyppet som symboliserte re-opninga at den oppgraderte banen, og nytta høvet til å skryta av alle volleyballtalenta som har blitt fostra opp i Åkra og Matre.

Enstad skulle eigentleg visa fram gamle volleyballkunstar i ein oppvisningskamp, saman med Stein Olav Ølvestveit som makker, men arrangøren av turneringa fann vêrtilhøva til å vera for vanskelege til at dei ville utsetja førsteklasses politikarar for sleip sandvolleyball.

Dermed vart det å følgja finalen i turneringa i staden, der Magne Bergane og Brynjar Berge gjekk sigrande ut.