Raskast i sporet og tok sølvet

IBU-cupen, som er nivået under verdscupen, var i helga samla i tyske Arber. Fredag stod 7,5 kilometer sprint på programmet. Ragnhild Femsteinevik frå Hatlestrand vart då nummer 6, etter éin strafferunde på kvar skyting. Ho enda 32,7 sekund etter den franske vinnaren.

På søndagens jaktstart gjekk det endå betre. Skyteserien viste rekka 0-1-1-0. I mål kom Ragnhild Femsteinevik inn på 2. plass. Skiskyttaren, som representerer Hålandsdal IL, var 30,4 sekund bak vinnaren. Samstundes var klaringa ned til bronsen på 17,5 sekund.

Beste tid

Ragnhild gjekk ut frå siste skyting på 2. plass, og var då 43,4 sekund bak vinnaren. Prestasjonen i sporet var veldig bra. Ho slo til med beste tid både på runde 1, 2 og 4, og dermed også best totalt.

Femsteinevik er no rangert som nummer 4 i IBU-cupen. Kanskje er det håp om uttak til verdscupen snart?

IBU-cupen held fram i slovakiske Brezno-Osrblie allereie frå 15. til 18. januar.