Ragnhild skal gå stafetten!

Det har vore stor usikkerheit og spenning knytt til kven som skal gå kvinnestafetten for Norge under verdsmeisterskapen i skyting. Marte Olsbu Røiseland og Ingrid Landmark Tandrevold har vore bankers, og i tillegg har Karoline Knotten vore eit sannsynleg val. Men kven av Ida Lien, nykomaren Juni Arnekleiv og Ragnhild Femsteinevik som skulle få den siste plassen har vore heilt ope.

Torsdag kveld melder TV2 at det er Femsteinevik frå Hatlestrand som er den heldige. Årsaka er nok hennar gode stafettprestasjonar i årets verdscup. Mellom anna var ho på laget då Norge vann stafetten i Ruhpolding.

– Femsteinevik har gått nokre bra stafettetappar før og har erfaring frå verdenscup, så eg kan forstå det valet, seier TV 2 sin skiskytingsekspert Ole Einar Bjørndalen til kanalen.

Trass eit ikkje heilt vellukka VM for Femsteinevik så langt, får ho no sjansen til å bli verdsmeister. 4 x 6 kilometer stafett har startskot klokka 15.00 på laurdag.

Rekkefølgja på etappane blir klar fredag ettermiddag. Vi kan samstundes leggja til at Femsteinevik ikkje skal gå søndagens fellesstart, som avsluttar verdsmeisterskapen.

Herrane stiller i stafetten med Tarjei Bø, Johannes Thingnes Bø, Vetle Sjåstad Christiansen og Sturla Holm Lægreid