Ragnhild skal gå 3. etappe - viss stafetten ikkje blir avlyst
Norge sitt lag til laurdagens stafett er klart. Men vêret kan setja ein stoppar for heile konkurransen.
Publisert
Sist oppdatert
Fredag ettermiddag vart det kjent korleis landslagsleiinga har disponert det norske laget under stafetten. Karoline Knotten startar, før ho overlet ansvaret til Ingrid Landmark Tandrevold. Så skal Ragnhild Femsteinevik i aksjon på 3. etappe, før Marte Olsbu Røiseland vonleg går Norge inn til medalje.
Norge er ikkje gullfavoritt, og både Sverige, Tyskland, Frankrike og Italia stiller med svært sterke lag. Men som verdscup-stafetten i Ruhpolding viste, så er jentene kapable til å vinna. Såleis blir det etter alle solemerke ein veldig spennande stafett.
Annonse
Farleg
Men, og det er eit stort «men»; vêrgudane ser ikkje ut til å spela på lag. Det internasjonale skiskyttarforbundet opplyser nemleg at dei laurdag morgon klokka 07.30 skal i møte med arrangørnemnda i vertsbyen Oberhof og lokale myndigheiter for å avgjera om stafettane kan gå av stabelen som planlagt.
«Ifølgje lokale myndigheiter kan sterke vindkast, meldt opp til 85 km/t, utgjera ein fare for løparane og publikum i dei skogkledde områda av løypa», skriv dei på nett.
Etter skjemaet skal mennene starta klokka 11.45, medan kvinnestafetten byrjar klokka 15.00. Vi får berre kryssa fingrane for at konkurransane let seg gjennomføra, eventuelt at dei berre vert utsett til anna tidspunkt.
