Ragnhild sikra seg NM-sølv
Sjukdom spolerte både sesongen og gjorde at landslagsplassen glapp for Ragnhild Femsteinevik førre vinter. Ho satsar likevel vidare. 28-åringen beviste at ho har gjort ein god jobb då det vart NM-sølv på Lillehammer.
Karoline Knotten, som har teke store steg og oppnådd fleire gode internasjonale plasseringar dei siste åra, var den einaste som hamla opp med Ragnhild på sprinten i noregsmeisterskapet i rulleskiskyting. Det var skytinga som redda landslagsløparen, for i løypa gjekk Hatlestrand-jenta like fort. Dette var ikkje overraskande med tanke på at det lokale stjerneskotet er ein av skiskyttarane med størst fysisk kapasitet.
– Det er godt å få stadfesta at treningsjobben eg har lagt ned held mål. Eg fekk dei svara eg var på jakt etter, nemleg at eg fysisk er der eg skal vere på denne tida av året, og at eg hadde kontroll på skytinga. Sjølv om eg gjerne skulle vore utan dei to strafferundane, seier Ragnhild, som gjennom sommaren og hausten har hatt mange gode opplevingar på treningane.
Annonse
Fleire kjem det nok til å bli dei neste vekene.
Stortrivst på nytt team
Ragnhild presterte veldig bra i 2023 og fekk den vinteren sin VM-debut som senior. Landslagsleiinga hadde forventningar om at ho skulle slå ut i full blom sesongen etter, men ho var uheldig og vart sjuk rett før sesongstart.
Med dei nye uttaksreglane, som ikkje lenger gav landslagsløparane den tryggleiken dei hadde hatt i samband med uttak, vart det vanskeleg å slå seg inn i troppen igjen. Det vart ein trøblete vinter for den ambisiøse skiskyttaren.
Annonse
Tyngst var det at landslagsplassen glapp. Ragnhild var lenge i tenkeboksen om kva ho skulle gjere vidare. Ho var motivert for å satse vidare på eiga hand og enda etter kvart opp på Team Havland, eit privatfinansiert team som satsar friskt.
Ho stortrivst både sportsleg og sosialt der. Dei har eit så bra sportsleg opplegg at det er fullt mogleg å utfordre dei beste til vinteren. For det er når snøen kjem at det vert viktig å prestere.
Det er dei renna som tel
– Eg har alltid likt meg betre på ski og snø enn på rulleski. Alle som er med i norgesmeisterskapen på rulleski har lyst til å gjera det bra, men det betyr ikkje noko i høve til verdscuputtak og liknande. Det er når me kjem til opningshelga på Sjusjøen at det vert viktig å prestere, seier Ragnhild, som etter NM-sprinten på rulleski kunne motta ein ny NM-medalje.
Det byrjar etter kvart å bli nokre NM-medaljar på Hålansdalen-utøvaren.
B-motivet
Annonse
I TOPPEN: Ragnhild Femsteinevik imponerte då ho skøyta inn til sølvmedalje i noregsmeisterskapet i rulleskiskyting.
