Ragnhild sesongopna med siger i Norgescupen
Ragnhild Femsteinevik er på gang igjen etter ein koronapause. Hatlestrand-jenta beviste i Norgescup-opninga på Geilo laurdag at sjukdomsavbrekket ikkje har sett ho altfor mykje tilbake.
Ragnhild skaut ni treff og gjekk fort i sporet då ho vann vinterens fyrste Norgescuprenn med 37 sekund. På ein sprint er det mykje, og det var betryggande for 28-åringen at ho slo alle som har ambisjonar om å konkurrera i IBU-cupen og verdscupen med over halvminuttet. Det i det som var hennar sesongopning, og trass i at Femsteinevik er eit stykke unna toppnivået.
– Det aller viktigaste for meg i helga var å koma i gang med sesongen. Kort og godt få gode gjennomkøyringar. Eg fekk begge deler og dei svara eg håpa på. Det største spenningsmomentet var korleis det ville bli å pressa seg. For eg har ikkje fått køyrt nokon hardøkter etter at eg fekk påvist korona. Eg trur det skal vera mogleg å gå ein del fortare når eg har fått køyrt fleire hardøkter, sa Femsteinevik etter at ho hadde vore i aksjon øvst i Hallingdal.
Annonse
God treningsjobb
Ragnhild Femsteinevik har hatt ein fin utviklingskurve dei to siste åra. Den tidlegare junior- og rekruttlandslagsløparen har vore ein av dei største positive overraskingane på damesida. Det førte ho til VM førre vinter. Det var god læring å få oppleva eit senior-VM som utøvar. Den erfaringa kan koma godt med dei neste åra. For den nest eldste av fem Femsteinevik-søsken, har ambisjonar om å få oppleva fleire store meisterskap framover.
I vinter er målet å kvalifisera seg for verdsmeisterskapen i Nove Mesto. Det langsiktige målet er imidlertid dei olympiske vinterleikane i Italia i 2026. Det skal konkurrerast mykje før det eventuelt blir OL-debut i Anterselva. Denne vinteren handlar det om å få konkurrert mest mogleg, og samtidig få gjort det best mogleg i verdscupen.
Ikkje til Finland
Annonse
Komande veke er det IBU-cuprenn som er ein slags World Cup B i Finland, men Ragnhild får ikkje vera med der.
– Den troppen vart teken ut etter opningsrenna på Sjusjøen. Vonleg er eg aktuell for neste IBU-cuptropp. Eg er avhengig å gjera det bra i IBU-cupen før eg får moglegheita i verdscupen. Det slapp dei som gjorde det bra på Sjusjøen. Men eg er glad for at eg er i gang, og føler det er fullt mogleg å gå seg inn i World Cup-troppane etter kvart, seier den gode skiskyttaren.
Av Svein Halvor Moe
PS! Grenda kan leggja til at Guro Femsteinevik vart nummer 16 i same løpet. Ho noterte to bomskot, og kom i mål 1.35,2 bak systera.
