Ragnhild med monsteretappe då Hordaland blei norgesmeistrar
Ragnhild Femsteinevik har fått si dose med sjukdom og motgang i vinter og dei siste åra. Søndag fekk likevel Hatlestrand-jenta ei etterlengta opptur då ho sørga for ein skrell av dei sjeldne i kvinnene sin NM-stafett.
– Eg tykte faktisk litt synd i Juni Arnekleiv då eg tok ho igjen. Ho hadde korkje noko toppdag eller perfekte ski. Det var den kombinasjonen, og at landslagskollegaen sprakk på ståande som gjorde det mogleg for meg å ta ho igjen, sa Ragnhild som var svært så beskjeden på eigne vegne då NM-gullet var eit faktum. Ni år etter at ho førre gong var med og sikra Hordaland NM-gull.
Det var ingen på Geilo som trudde det var mogleg å nekta Nord-Østerdal stafettgull, då Juni Arnekleiv vart sendt ut med to minuttar leiing til Nordland. Den rekna sterkaste løparen hadde eit så stort forsprang, at ingen trudde at det var mogleg å rote den vekk. Men Ragnhild gjekk eit kjempeløp, og då Arnekleiv fekk tre strafferundar på ståande, vart det i alle fall litt spenning på Geilo.
Annonse
Fekk ned alle blinkane
– Eg hadde gode ski og ein bra dag i sporet. Eg var mykje piggare i dag enn på sprinten fredagen, sa Ragnhild, som trengte eit par skikkelege gjennomkøyringar for å få opp farta. Ho låg heile 45 sekundar bak Arnekleiv etter andre skyting, men åt opp det forspranget ganske fort. Det var inspirerande å sjå ryggen på Arnekleiv, sjølv om det ikkje var den beste utgåva av Arnekleiv ho jakta på.
– Eg hadde ingen moglegheit til å følgja Ragnhild då ho kom. Eg hadde ein så stor leiing at det burde ha heldt unna. Men når eg først skulle bli slått, så er det ingen eg unner denne triumfen meir enn Ragnhild. Det har vore utruleg mykje stang ut for ho i vinter. Ho låg an til å gå ein god sesong i møte då ho fekk korona og mista sesongopninga og starten av sesongen, sa Arnekleiv.
Guro la grunnlaget for sigeren
Annonse
Guro Femsteinevik la grunnlaget for Hordaland-gullet i kretsstafetten. Ragnhild si litlesøster gjekk startetappen i dei kravande løypene. Ho sørga for at Julie Kvelvane frå Voss fekk eit godt utgangspunkt. Stortalentet frå idrettsbygda tok godt vare på det. Kvelvan følgde opp den flotte sprintinnsatsen med å bidra til at Hordaland var i medaljestriden, då Ragnhild gjekk ut.
– Det er utruleg stort å få vera med på dette, sa Guro, som sikra seg sitt fyrste NM-gull som senior då Hordaland gjekk til topps i Buskerud.
