Ragnhild har vore langt nede

Månadane har vore så tøffe at landslagsløparen i periodar har tvilt på om det har vore mogeleg å koma tilbake på det nivået ho var på før ho testa positivt for korona i starten av november, og med det mista sesongstarten.

Det blei starten på ein vond periode. For ei som lever av og for å gå fort på ski, og ikkje minst skyta bra, blir det problematisk så lenge kroppen ikkje speler på lag.

– Eg har i periodar vore langt nede. Eg har tvilt både på den treningsjobben eg har gjort, og om eg vil klare å komme tilbake. Derfor var det ein kjempeopptur for meg at eg gjekk så fort på ski som eg gjorde i helga. Det beviser at eg framleis har bra fysisk kapasitet når eg er frisk og det flyt. Treningsperioden i jula og først på nyåret var heilt nødvendig for å koma tilbake, seier Ragnhild til Grenda.

Blir «straffa» i uttak

Nye uttaksregler til verdscup og IBU-cup har ført til at de som blir sjuke og mistar viktige renn, blir hardt straffa i uttak. Ragnhild har fått føla det på kroppen dei siste vekene. Men det mest bekymringsfulle er at den gode treningsformen som ho hadde gjennom sommaren og hausten har vore borte. Den gode langrennsløparen trur kanskje ho no har funnet svaret på det.

Ragnhild gjekk fort, vann og fekk ein kjempestart på det nye året

– Konkurransane kom tett etter at eg blei friskmeldt. Det førte til at eg ikkje fekk trent meg opp igjen. Eg gjekk renn på renn utan å få tatt ut potensialet. Det kan sjå ut som min «private» treningssamling på Lillehammer i jula har gjort underverk. For det var mykje meir sprut i gåinga i helga. Det var ein opptur sjølv om det blei alt for mange bom og strafferundar, seier Femsteinevik.

Har følt på presset

VM i Nove Mesto var vinterens store mål for Ragnhild før ho ble sjuk. Ho er innforstått med at det ryker. Det same gjer nok europamesteirskapet. Håpet er at ho presterer så bra framover at det blir IBU-cup og verdenscup mot slutten av vinteren. I så fall er det fullt mogeleg å overtyda landslagsleiinga om at ho fortener ein ny sjanse. Dei kjenner både til potensialet og kvifor det har gått som det har gått med ho så langt i vinter.

– Eg håper at formpila held fram å peika rett veg, og at eg tar med meg dei gode opplevingane eg har hatt på trening inn i renn. Det handlar om å tenka minst mogeleg konsekvensar når eg ligger eller står på standplass, seier Ragnhild som gjorde eit tøft val før jul.

Ho bestemte seg for å tilbringa jula på Lillehammer, slik at ho var sikra gode snø- og treningsforhold. Hele familien reiste like godt til OL-byen, slik at dei kunne feira høgtida saman med ho.

Fekk besøk av familien

Det sette Ragnhild stor pris på. Mamma og pappa og dei fem skiskyttarsøskena fekk ein fin jul i Oppland. Otto, som måtte gi seg på grunn av helseplager, er den einaste av dei fem som ikkje satsar på skiskyting. Yngstemann Gitle går også i fot- og skispora til sine eldre søsken, som alle gjer det bra.

– Eg har ein flink mentaltrenar som har vore til stor hjelp i den tunge tida. Han og mine næraste har vore gode støttespelarar i den perioden kor det har butta i mot, seier Ragnhild som var langt lettare til sinns etter helga enn ho var før, sjølv om ho som oftast er blid og i godt humør.