Ragnhild har OL i tankane
Det er godt og vel eitt år igjen til den olympiske elden blir tent i dei norditalienske Alpane. Hatlestrand og Kvinnherad kan i 2026 for aller fyrste gong få ein vinter-OL-deltakar i det arrangementet.
– Eg har OL i Italia i tankane. Eg tek sikte på å satsa for fullt i minst éin sesong til. Det betingar imidlertid at eg får gode svar i vinter, og ikkje minst har den motivasjonen som må liggja i botn for å ha moglegheit til å prestera internasjonalt. Vonleg får eg nokre gode opplevingar dei neste månadane, seier Ragnhild, som debuterte tidleg i verdscupen. Det er mange år sidan ho for aller fyrste gong konkurrerte med dei beste i verda.
Ragnhild Femsteinevik kom for nokre dagar sidan heim frå eit tre veker langt høgdeopphald i franske Font Romeu. Det var fleire grunnar til at ho og teamet valte å leggja siste del av sesongoppkøyringa dit. Fyrst og fremst fordi det gav utøvarane moglegheita til å få gjennomført bra barmarksøkter i fint klima i det som kan vera den mest utfordrande treningsperioden i Norge. Det er gjerne vanskelege rulleskiforhold her til lands i oktober og november.
Annonse
Håpar på høgdeeffekt
Høgdeeffekten var også eit viktig argument for at trenarane tok med seg Ragnhild og dei andre på teamet til Mellom-Europa. Team Havland har fleire utøvarar som har ambisjonar om å gå verdscup og IBU-cup komande vinter. Fleire av desse renna går i høgda, og då er det viktig å ha kunnskap og erfaring på korleis det er å trena i tynn luft.
Ragnhild har gått både verdscup og IBU-cup i høgda og har erfaring på området.
– Eg har forhåpningar om at høgdeopphaldet også skal vera formutløysande med tanke på sesongstarten. Det er mange som har god erfaring med at dei går fort på ski etter at dei har vore i høgda. Det skal bli interessant å sjå korleis det slår ut for meg, seier Ragnhild, som satsar på skiskyting på heiltid. Ho har fått erfara at det er utfordrande å kombinera satsing på dette nivået med studiar eller jobb som hadde vore alternativa.
Annonse
Strikkepinnane er med
Strikketøyet er sjeldan langt unna når Ragnhild skal kopla av eller restituera seg etter øktene. Strikking er god avkopling for ein toppidrettsutøvar som meiner det er fornuftig å ha noko anna å tenka på mellom standplassopphalda og treningssamlingane i inn- og utland.
– Kva tenkjer du om den framgangen som Guro har hatt det siste året?
– Det er stas at ho får betalt for den treningsjobben som vert lagt ned. Eg trener av og til med ho, og er ikkje overraska over at ho blir betre og betre. Guro har framleis to sesongar igjen som junior, men har alle moglege føresetnader for å ta seniornivået når den tid kjem, seier Ragnhild Femsteinevik.
