Ragnhild gjekk ankeretappen då Norge vann

IBU-cupen, altså nivået under verdscupen, har dei siste dagane vore i den austerrikske bygda Obertilliach. Søndag stod miksstafett på programmet. For Norge gjekk Johannes Dale-Skjevdal den fyrste etappen. Deretter følgde Johan-Olav Botn og Siri Skar, før Ragnhild Femsteinevik frå Hatlestrand avslutta det heile.

Ragnhild starta sin etappe 7,4 sekundar bak Tyskland. På liggjande var tyskaren feilfri og rask, medan Ragnhild trengte to ekstraskot. Avstanden auka då til 14,5 sekund. På ståande var rollene bytt om. Tyskland brukte eitt ekstraskot, medan Ragnhild Femsteinevik leverte ein lynrask og feilfri serie. Tyskland leia likevel med 1,3 sekund ut frå standplass.

På slutten gjekk Hatlestrand-ekspressen forbi, og førde Norge inn til siger med 7,1 sekundars margin. Alle dei fire norske skaut feilfritt, og tilfeldigvis brukte alle også to ekstraskot kvar.

Blanda drops

Elles har opphaldet i Obertilliach bydd på blanda drops for Ragnhild Femsteinevik. På sprinten på torsdag var ho heilt i tetstriden, og vart nummer fire. To bom på ståande gjorde at ho enda 24,9 sekundar bak vinnaren. På laurdagens 12 kilometer fellesstart vart ho nummer 36, etter heile seks bomskot.