Ragnhild får gå for Norge
Kontrastane var store for Ragnhild Femsteinevik i helga. Laurdag gjekk ho eit kjempeløp, og på søndag vart det heilsprekk på standplass. Helga vart likevel redda da ho vart teken ut til å gå dei fyrste IBU-cuprenna.
– Eg er veldig nøgd med det slik omstenda vart. Det var lenge usikkert om det i heile tatt ville bli nokon start på meg her etter at eg falt og skada skuldra på rulleski i Frankrike. Heldigvis så var eg i stand til å gå, seier Ragnhild, som var World Cup-aktuell etter laurdagens flotte prestasjon på Sjusjøen.
Det låg nemleg ein World Cup-plass i potten både på dame- og herresida. Men den moglegheita forsvann på fyrste skyting på søndag.
Annonse
– Det var ein kombinasjon av for mykje vind og stress i hovudet som gjorde at det var så mange skot som hamna utanfor blinken. Eg er ikkje bekymra over at det vart så mange bom. For eg har skote bra på trening i sommar og haust. Det var nok vinden og den spesielle settinga som gjorde at eg måtte gå så mange strafferundar på dagens fellesstart. Eg kan betre, og håpar å få bevist det i dei neste renna, sa Ragnhild då ho oppsummerte helga.
For Norge igjen
Ragnhild Femsteinevik visste at ho måtte prestera på Sjusjøen for å ha moglegheit for å bli med i diskusjonen om World Cup- eller IBU-cupplass. Hennar flotte løp på laurdag vart avgjerande for at ho om to veker får gå i norsk landslagsdrakt igjen. Hennar nann er med når landslagsleiinga måndag føremiddag presenterer kva løparar som skal representera Norge i den fyrste IBU-cuprunden i svenske Idre. Det er ho glad for.
– Eg vil mykje heller gå IBU-cup enn norgescup på Geilo, som hadde vore alternativet så lenge eg ikkje var med i World Cup-diskusjonen. Det blir kjekt å konkurrera internasjonalt igjen, sa 29-åringen, som stort sett berre gjekk norgescup førre sesong.
Annonse
Det var fyrst mot slutten av sesongen ho fekk ei sjeldan moglegheit i IBU-cupen. I vinter er målet å få konkurrera i verdscupen og samtidig vera med og kjempa om ein VM-plass.
Solid treningsjobb
– Eg føler at eg har eit betre utgangspunkt enn nokon gong, sjølv om det var kjedeleg med rulleskifallet. Men eg føler ikkje at det har sett meg tilbake. Det bør gå fint å handtera det, sa ein av Kvinnherads fremste toppidrettsutøvarar, som har satsa for fullt på skiskyting sidan i 15-16-årsalderen.
Ho fekk i likskap med dei fleste andre likevel kjenna på konkurransenervane i Sjusjøen-terrenget. Det er naturleg så lenge det er den fyrste konkurransehelga og det er mykje som stor på spel.
– Kva skal du gjera for å vera ei kvassare utgåve av deg sjølv i Sverige? – Eg har tenkt å trena mykje og hardt inn mot neste konkurransehelg. Så får vi håpa at det er formutløysande og eg har meir å gå med i helga. Eg føler ikkje at eg fekk teke ut potensialet, sjølv om eg gjekk fort på laurdag. Det er fyrst og fremst på standplass eg må heva meg, seier ho som synest det blir stas å få å gå i dei norske tekstilane igjen. Gode prestasjonar i IBU-cupen vil vera ein sterk søknad om å få gå verdscuprenn før jul.
