Ragnhild er revansjelysten
Ragnhild Femsteinevik var i sitt livs form då ho vart sjuk rett før sesongstart i fjor. Det var eit sjukdomsavbrekk som kom til å påverka heile sesongen, og 29-åringen klarte aldri å henta seg inn før vinteren var omme. Derfor er ho revansjelysten når ein ny sesong no startar.
Fjoråret førte til at landslagsplassen gjekk fløyten. Hatlestrand-jenta var i tenkeboksen om kor vidt ho skulle fortsetja satsinga eller rett og slett avslutta toppidrettslivet. Ragnhild, som har fleire år bak seg på landslag, landa heldigvis på det fyrste. Fleire private lag ville ha ho med, og det enda opp med at ho takka ja til Team Havland, som Knut Tore Berland, opphavleg frå Kvinnherad han også, er arkitekten bak. Ragnhild har funne seg veldig godt til rette der.
– Eg har eit veldig bra opplegg, og stortrivst saman med den flotte gjengen som utgjer laget. Eg har lete meg imponera over kor godt organisert og tilrettelagt alt er. Det var fornuftig av meg å bli med der då eg bestemte meg for å satsa vidare, seier Ragnhild, som har lagt førre sesong bak seg.
Annonse
Den vart prega av at ho mista dei fyrste renna og aldri var i nærleiken av å få tatt ut potensialet før det var for seint. NM vart rett nok ein opptur.
Med frå starten
Det blir viktigare enn nokon gong å gå fort i dei internasjonale opningsrenna på Sjusjøen. For det ligg fleire World Cup og IBU-cupplassar i potten. Dei fyrste uttaka skjer allereie i desse dagar. Ragnhild har eit håp om at ho skal gjera det så bra i opningsrenna at ho får representera Norge med det fyrste. Det fristar naturlegvis mest med verdscup. IBU-cup som er ein slags World Cup B, er heller ikkje noko dårleg alternativ for Femsteinevik.
– Eg fokuserer på arbeidsoppgåvene. Dersom eg lukkast med dei, så blir også resultatet som oftast bra. Eg håpar at eg i vinter kan løfta både topp- og botnnivået. Kort og godt bli meir stabil, seier Ragnhild, som har hevda seg både i IBU-cupen og verdscupen.
Annonse
For tre år sidan var det lite som mangla på at ho henta heim samanlagttrofeet i IBU-cupen. Det vart så mange gode prestasjonar og plasseringar at ho enda opp som nummer to samanlagt. Den vinteren gjekk det også ein god del euro inn på «lønnskontoen» ettersom det internasjonale skiskyttarforbundet betalar bra til dei beste.
Det vart smått med pengepremiar sist vinter, ettersom både representasjonsoppgåvene og dermed også topplasseringane uteblei.
Av dei beste i sporet
Det er utan tvil i langrennssporet at Ragnhild Femsteinevik har sin styrke. Ho har også hatt dei beste tidene i enkelte verdscuprenn. Dei gongene ho har gode ski og kroppen spelar på lag, er det ikkje mange som held følgje med Hålandsdalen-utøvaren. Det har vist seg at det ikkje er lett å hamla opp med ho dei gongene blinkane fell.
Ragnhild Femsteinevik beviste i norgesmeisterskapen i rulleskiskyting i september at ho har blitt ein betre skyttar. Der vart det to andreplassar og sølvmedaljar. Landslagstrenarane og andre har sett at jenta som deltok i senior-VM i 2023, ofte har skote mykje betre på trening enn i renn. Ragnhild har inga fullgod forklaring på korfor det har vore slik.
– Eg jobbar for å få overført dei gode opplevingane på trening til konkurransar, seier Ragnhild, som føler ho har lært mykje av motgangsperiodane. Det gjer at ho har eit meir avslappa forhold til prestasjonsfokuset. Skiskyttaresset har eit håp om at det skal hjelpa henne.
Annonse
Tekst/bilete: Svein Halvor Moe
