Prøver på ny utfordring med ny sykkel

Nyss var den Gjøvik-busette omvikdelingen på heimlege trakter. Med på lasset over fjellet hadde han sin nye temposykkel, ein sykkel han trur og håper skal kunna gje han ein ny norgesrekord.

– 200 kilometer temporitt er ein offisiell distanse i sykkelforbundet, der rekorden har stått sidan 1987. Den vart slått i fjor. Etterpå fekk eg melding frå ein tidlegare lagkamerat som sa «Denne hadde du lett slått». Så eg skal prøva å slå rekorden i sommar, smiler Vidar Mehl etter å ha rulla nokre rundar på asfalten som snart skal bli friidrettsbane i Rosendal.

Flatt

– Eg ventar på formell godkjenning frå forbundet på lengda på løypa, og at det er på plass dommarar og tidtaking, forklarer Mehl.

I Kongsvinger-området har han funne ei 25 kilometer lang strekke med minimale høgdeskilnader, som han håper å få bruka.

– Eg hadde ein test på 100 km tidlegare i vår, og då kom eg ut med 100 høgdemeter. Så det er så flatt som du berre får det på Austlandet. Men det er det som må til for at det skal gå fort nok, seier han

Til samanlikning hadde han og broren Kjetil 50 høgdemeter på kvar runde då dei sykla i 24 timar i fjor, totalt nær 8000 høgdemeter i løpet av dét rekordløpet.

– Så lenge det er bra vêr, så kan det gå. Problemet er at me må søkja om å få nytta strekninga på éin spesifikk dag, og løpet må syklast den dagen. Eg skal prøva å køyra jamt, og finna flyten. Så får eg kjenna etter når det er 50 km att om eg kan pusha opp litt, meiner han.

Proff

Mehl har sidan før Covid-19-utbrotet sykla inne på rulle, men for allverda tok det verkeleg av då pandemien sette stoppar for utøvarar å møtast fysisk. No koplar ein rulla opp mot ei digital løype, så trakkar syklistar verda over seg gjennom same løypa samtidig. Rulla og programvara er det Swift som leverer.

– Det er stort å vera på det første World Tour laget som lagar eit lag for innesykling. Kor mange millionar som har eit slikt Swift-abonnement veit eg ikkje, men det er ein del å ta av, og at eg kom meg gjennom det nålauga er tøft. Og dette er berre starten på kor dette er på veg, spår Vidar, som trur ein fem år fram i tid vil sjå at mange vil leva av e-sportsykling.

Om det blir Swift eller anna plattform, veit ein ikkje, men noko slikt blir det, meiner Mehl

Han slår fast at det generelle nivået på syklistar i Norge har allereie auka mykje som følgje av dette. Ein treng ikkje å kle på seg og gå ut i haustregnet for å trena, no er det berre å ta på seg shortsen setja seg på sykkelen i kjellaren.

– Eg har sykla med både Håvard Pedersen og Gunnar Hestad på ritt på Swift. Dei er knallsterke dei, vurderer Mehl.

Justering

Den nye sykkelen er nesten så rask som det er råd til å få ein slik sykkel. I forhold til andre syklar, er det stor wattinnsparing på denne, som gjer at ein brukar mindre energi på kilometeren.

– No er det mykje småting som me finn og justerer på, alt for å spara ein watt her og ein watt der, fortel Vidar og nemner mellom anna å tapa igjen holet til ventilen for å spara ørlite meir.

– Eg kjøpte meg temposykkel i vinter, men i eit anna merke. Så kom Moviestar på banen, og eg spurde etter ei tid om eg kunne få låna eit hjul av dei til den nye sykkelen min. Det fekk eg nei på. Men dei hadde ein heilt splitter ny sykkel som eg kunne få låna, gliser Vidar.

– Mi største utfordring no er å få nok timar på sykkelen. Sitjestillinga er heilt annleis enn på ein racersykkel, så eg må trena mykje for å få det justert på plass. Eg håper ikkje det blir særleg med terrengløp framover, for det har eg ikkje tid til, sluttar han før han rullar ut på asfalten igjen.