Populær sandvolleyballskule
I underkant av 40 born og ungdommar starta sommarferien med sand mellom tærne. Det var nemleg skipa i stand sandvolleyballskule på Hatlestrand.
Publisert
Dei lokale volleyballtalenta Henrik Tholo Aasen, Sturla Gaugstad, Lars Kristian Ekeland og Tora Tuften Aksnes Øystese inviterte til sandvolleyballskule tre dagar til endes. Fredag og søndag baud på fint ver og utespel, medan laurdagen vart nytta inne i hallen.
– Me synes det er veldig kjekt med volleyball og har lyst å dele den kunnskapen og gleda med dykk, inviterte arrangørane.
Annonse
Dei påmeldte vart delt opp etter alder i to grupper, kor den første pulja bestod av ungar frå 3. – 6. klasse, og den andre gjekk frå 7. trinn til 1.vidaregåande. Grenda slo av ein prat med nokre frå den første gruppa, som hadde pause med grilling og andre aktivitetar medan dei eldste nytta hallen.
Kjekk start på sommarferien
Malin Kristina (9), Live Marie (9) og Savannah (10) tykte det var veldig kjekt å starta sommarferien med litt sandvolleyball.
– Eg har spelt volleyball før, men ikkje sandvolleyball då, informerte Savannah.
Annonse
Ho hadde selskap i klasseveninna si frå Ølve, Malin Kristina, og dei hadde begge gått på volleyball i eitt år kom dei fram til.
– Me har lært oss smash, trent på fingerslag og begerslag, og så har vi lært oss forsvar, fortalte ho blidt i si nye t-skjorte.
Live Marie frå Hatlestrand var heller ikkje heilt uerfaren i sporten.
– Eg har spelt litt sandvolleyball før, men mest vanleg. Men sandvolleyball er gøyare, for det er ikkje vondt når ein slengjer seg, slo ho fast.
– Nei, ein får ikkje skrubbsår heller, supplerte Malin Kristina oppglødd.
Ein anna fordel med sandvolleyballskulen var at dei fekk seg nye vener. Både Savannah og Malin Kristina peikte blidt på Live Marie på spørsmål om dei hadde fått nye vener. Og dessutan var det som om å vera i syden.
Annonse
– Berre sjå sandstranda der, strålte dei og viste til bakteppet i hallen.
Gjennomgang av alle fasane i spelet
Rundt ein tredjedel av deltakarane hadde ikkje spelt for klubb tidlegare, og det var heller ikkje noko krav for å bli med. Alle var velkomen. I løpet av helga ville dei gå gjennom alle fasane i spelet, slik at deltakarane kunne sitja att med gode øvelsar som dei seinare kunne gjera nytte av, forklarte Henrik Tholo Aasen i eit gruppeskifte.
– Det er dessutan viktig for oss å skape glede for sandvolleyball, avslutta han.
