På venteliste til NM
G17-laget til Strand-Ulv var to forsmedelege tie break-tap frå å få NM-billett. Fjerdeplassen i RM gjer at dei står på ei neglebitande venteliste enn så lenge.
Publisert
Regionsmeisterskapen i Kvam i helga vart ei travel helg for mange, men spesielt for Strand-Ulv-trenar Trine Sundfjord. Som trenar for både jente- og gutelaget som var i sving – i tillegg til å ha eit barn på kvart av laga – vart timeplanen stri for trenaren.
– Laurdag var gutane i Øystese og jentene i Norheimsund. Eg måtte dela på meg for å få dette til, både som trenar og mor. Det blei til at eg raksa att og fram mellom hallane, og gjekk glipp av kampar for begge laga. Under sluttspelet på søndag var alle kampane samla i same hall, så då fekk eg med meg kampane til begge laga, forklarer Sundfjord.
Annonse
Tette kampar
G17-laget hadde etter trenaren i si meining litt flaks med puljeinndelinga.
– Seedinga vert basert på resultat i seriehelgane. Dei helgane har ikkje alle dei beste klubbane prioritet like tungt. Derfor var det tre gode lag som vart seeda i den andre puljen enn me var i. Det var med på å gjera vegen til semifinale lettare for oss, vurderer trenaren.
Sjølv var ho i ein annan hall då gutane spelte den avgjerande puljekampen mot Kvernbit, ein av tre kampar som gutane måtte gjennom tie break i.
Annonse
– Eg var sjukt lukkeleg då eg høyrte at gutane vann tredjesettet 15-12. Då vann dei puljen og gjekk rett til semifinalen. Så blei det knallhardt for dei på sluttspeldagen. Dei blei knuste i førstesettet mot Viking. Dei vann andresettet, men rauk i tredjesettet. Så bar det rett på bronsefinale 15 minutt etter semien var over, fortel Sundfjord.
Dei var sletne på veg inn i bronsefinalen, som også baud på eit knipent 2-1-tap.
– Det var ein sur fjerdeplass, for 3. plassen ville gitt NM-billett. No sit me og kryssar fingrane på at Hordaland skal få ein fjerde plass i NM. Det løyste seg på det viset i fjor, så det spørst om ein har brukt opp flaksen. Sjølv om det var seigt og surt, så er gutane også fornøgde med det dei har prestert, i det som er ein veldig jamn guteklasse, sluttar Sundfjord.
