På 1. og 3.-plass i same ritt

Vidar Mehl opna maratonsesongen med å sykle det 102 kilometer lange Alborg MTB maraton førre laurdag.

For fjerde år på rad hadde han teke turen til Danmark for å ta del i rittet, som har gitt han høvesvis 1., 2. og 3-plass tidlegare. Mehl, som i år syklar for Swix Hardrocx Cycling Team, sykla rittet for fyrste gong på ein fulldempar-sykkel, noko som synte seg å vera eit godt val.

– Eg har skifta lag i år, og sykla på ein nyutvikla fulldempa sykkel, noko som gav utruleg god flyt over det som var av humpar og småslag, fortel omvikdelingen nøgd.

– Ein skulle tru at sykkelritt i Danmark er rimeleg flate, men det vart totalt 1.000 høgdemeter, supplerer den hardsatsande syklisten.

 

Arrangørtabbe

Rittet i år utvikla seg i følgje Mehl som det plar gjera, men då dei nærma seg mål vart det brått dramatikk.

– Det gjekk veldig bra til det var omkring éi mil att av løpet. Då vart plutseleg all markering vekke, og eg og dei to andre som eg låg i tett med var plutseleg på feil veg. Vi spurte løypevakten, men han visste ikkje kor løypa gjekk, kommenterer Mehl.

Etter litt att og fram fann dei til slutt tilbake til rett veg, men då hadde tre stykke passert dei.

– Etter å ha sjekka gps-en mista vi nok 4-5 minutt på grunn av arrangørtabben. Det var ikkje tvil om at sigeren hadde stått mellom oss tre som låg i front sidan vi hadde så mykje tid å gå på, og auka stadig vekk, analysere han.

Blant dei tre som passerte Mehl si gruppa, var det ein lokalkjent som visste kor løypa gjekk.

– Eg spurta inn til det som då vart tredjeplass, noko som eigentleg var rimeleg surt. Vi la inn protest sidan det var ein klar arrangørtabbe. Alle var einige om at det var gjort feil, så det vart laga til ein offisiell pall der eg havna på tredjeplass og ein uoffisiell pall der eg stod som vinnar, fortel Mehl.

 

Betre nivå

Det neste på programmet for Mehl og det hardsatsande Swix-laget er Norgescup i Å ved Birkeland.

– Det er omsider start i Noreg, og det gler eg meg til. Nivået vert berre betre for kvart år, så konkurransen er stor, men eg satsar jo på å vera med i toppen, sluttar ein offensiv Mehl.