Over 50.000 tilskodarar heia Guro inn til siger i Tyskland

Guro og den nordnorske makkeren kryssa mållinja fyrst i Team Challenge Talent, som er den mest prestisjefylte skikonkurransen ved sida av OL og VM. Fyrst og fremst på grunn av at det kvar romjul er over 50.000 tilskodarar som benkar seg ned på det flotte fotballstadionet til Schalke 04. Billettane blir raskt rivne bort når dei blir lagt ut for sal i det skiskyttargale Tyskland.

For Guro var det spesielt å få kjenna på publikumstrykket.

– Eg må innrømma at eg i timane og ikkje minst minuttane før start, var litt meir spent enn det eg brukar å vera. Fyrst og fremst korleis det ville bli å konkurrera føre så mange tilskodarar. Men også fordi dette var ein tomannsstafett, seier Guri til Grenda.

Det blir gjerne litt meir press på dei unge skuldrane så lenge ein eventuell dårleg prestasjon vil råka den ho går saman med. Det slapp Hålandsdalen-utøvaren å bekymra seg for.

Fekk ned blinkane

– Det blir ei spesiell konkurranseform når skytinga betyr så mykje som den gjer i Schalke. Det var derfor viktig å få ned blinkane. Eg følte at det meste av nervøsiteten forsvann då rennet var i gang. Eg klarte i alle fall å roe meg ned på standplass. Det var utruleg kjekt at vi gjekk til topps. Men det er nok folkehavet og stemninga som eg kjem til å hugsa best frå min fyrste start på dette flotte og populære arrangementet, seier Guro.

Guro Femsteinevik er ærleg på at ho merka trykket på tribunane. Tyskarane heia forståeleg nok mest på sine eigne. Men Guro og Gerhardsen fekk sin velfortente hyllest då dei sette dei andre nasjonane på plass.

Austerrike nærast

Det var Austerrike som la beslag på andreplassen, med vertslandet på tredje. Det kan elles bli eit nytt møte mellom Guro og dei utanlandske løparane i Østersund om nokre veker, dersom den yngste av Femsteinevik-søstrene klarar å kvalifisera seg for juniorverdsmeisterskapen i Sverige. Det har ho ambisjonar om.

– Korleis var det å reisa utanlands mot slutten av jula for å konkurrera?

– Det var heilt klart verdt det ettersom dette vart ei oppleving og minne for livet, fortel Guro, som både har fått trena bra og konkurrert i jula.